Tirumala: శ్రీవారి గోల్డ్ డాలర్స్‌కి పెరిగిన క్రేజ్.. ఎగబడి కొనుగోలు చేసిన భక్తులు |

తిరుమల శ్రీవారి దర్శనం కోసమే కాదు ఆయన ముద్రతో ఉన్న డాలర్ల కోసం కూడా భక్తులు ఎగబడ్డారు. బంగారం ధరలు పెరిగినప్పటికి భక్తుల్లో ఆలయం ఎదుట ఏర్పాటు చేసిన కౌంటర్ దగ్గర నిలబడి మరీ శ్రీవారి డాలర్లను కొనుగోలు చేశారు. ఆదివారం మధ్యాహ్నం నుంచి సోమవారం మధ్యాహ్నం వరకు విక్రయాలు జరపగా ఆదివారం రూ.70 లక్షలు, సోమవారం రూ.40 లక్షల విలువైన బంగారు డాలర్లను టీటీడీ విక్రయించింది. గతేడాది అక్షయ తృతీయ నాడు సుమారు రూ.90 లక్షల అమ్మకాలు జరగ్గా, ఈసారి ఆ రికార్డును అధిగమించడం విశేషం.

అక్షయ తృతీయ రోజున శ్రీవారి ప్రతిమ ఉన్న బంగారు డాలరు కొనుగోలు చేస్తే శుభం కలుగుతుందని, సిరిసంపదలు వృద్ధి చెందుతాయని భక్తులు నమ్ముతుంటారు. బంగారు డాలర్లతో పాటు వెండి, రాగి డాలర్లను కూడా టీటీడీ భక్తులకు అందుబాటులో ఉంచింది.గతంలో ఈ శ్రీవారి డాలర్ల కొరత ఉన్నప్పటికి వాటిని అధిగమించేలా ఈసారి టీటీడీ భక్తులకు సరిపడ డాలర్లను తయారు చేయించి విక్రయించింది. ఈవిధంగా వచ్చిన డబ్బును కూడా టీటీడీ భక్తులకు, టీటీడీ టెంపుల్ అభివృద్దికి ఖర్చు చేయనుంది.