AMRUT Scheme: పలమనేరుకు భారీ వరం.. అమృత్ పథకం కింద రూ.16.5 కోట్ల నిధులు మంజూరు..! | ఆంధ్రప్రదేశ్ వార్తలు

ఈ అభివృద్ధి పనులకు సంబంధించిన టెండర్లను ప్రముఖ నిర్మాణ సంస్థ మేఘా ఇంజనీరింగ్ అండ్ ఇన్ఫ్రాస్ట్రక్చర్ లిమిటెడ్ దక్కించుకుంది. ఈ నేపథ్యంలో ఆ సంస్థ ప్రతినిధులు, పబ్లిక్ హెల్త్ డిపార్ట్మెంట్ ఉన్నతాధికారులు సోమవారం నాడు పలమనేరు ఎమ్మెల్యే అమరనాథ్ రెడ్డిని మర్యాదపూర్వకంగా కలిశారు. ఈ సందర్భంగా అభివృద్ధి పనుల ప్రణాళికలపై ఎమ్మెల్యే అధికారులతో మాట్లాడారు. పట్టణంలో చేపట్టే ప్రతి పనిలోనూ నాణ్యతా ప్రమాణాలు పాటించాలని, ఎక్కడా రాజీ పడకూడదని కాంట్రాక్ట్ సంస్థకు ఎమ్మెల్యే స్పష్టం చేశారు. పనులు జరిగే సమయంలో స్థానిక ప్రజలకు ఎలాంటి ఇబ్బందులు కలగకుండా చూసుకోవాలని ఆదేశించారు.

ఈ భారీ నిధులతో పలమనేరు మున్సిపాలిటీ పరిధిలో నీటి నిల్వ సామర్థ్యాన్ని పెంచేందుకు అధునాతన ట్యాంకుల నిర్మాణం, పైప్‌లైన్ పనులు చేపట్టనున్నారు. గంటావూరు ప్రాంతంలో 4.5 లక్షల కిలోలీటర్ల భారీ సామర్థ్యంతో సరికొత్త నీటి ట్యాంక్ నిర్మిస్తారు. గడ్డూరులో 3 లక్షల కిలోలీటర్ల కెపాసిటీతో మరో నీటి నిల్వ ట్యాంక్ అందుబాటులోకి రానుంది. స్థానిక ప్రభుత్వ పాలిటెక్నిక్ కళాశాల ప్రాంతంలో 2.5 లక్షల కిలోలీటర్ల సామర్థ్యంతో మూడో ట్యాంక్ నిర్మించనున్నారు. పట్టణ పరిధిలో దశాబ్దాల క్రితం వేసిన పాత పైప్‌లైన్ల స్థానంలో కొత్త వ్యవస్థను ఏర్పాటు చేస్తారు. లీకేజీలు ఉన్న చోట తక్షణ మరమ్మతులు చేపడతారు. స్వచ్ఛ భారత్ నిధుల ద్వారా పలమనేరు పట్టణంలోని పెద్ద చెరువును పర్యాటక ప్రాంతంగా తీర్చిదిద్దనున్నారు.

ఈ పనులన్నీ పూర్తయితే పలమనేరు మున్సిపాలిటీ పరిధిలో నివసించే ప్రజలకు తాగునీటి సరఫరా మరింత మెరుగుపడుతుంది. వేసవి కాలంలో కూడా నీటి కొరత రాకుండా భవిష్యత్ అవసరాలకు తగ్గట్టుగా నీటి నిల్వ సామర్థ్యం పెరుగుతుంది. పెద్ద చెరువు అభివృద్ధి చెందడం వల్ల పట్టణ రూపురేఖలు మారి, స్థానికులకు మంచి వినోద కేంద్రం అందుబాటులోకి వస్తుంది. ప్రజల ప్రాథమిక అవసరాలను తీర్చడమే లక్ష్యంగా తమ ప్రభుత్వం పనిచేస్తోందని ఎమ్మెల్యే అమరనాథ్ రెడ్డి తెలిపారు. నిర్ణీత గడువు లోపు పనులను పూర్తి చేసి ప్రజలకు అంకితం చేయాలని ఆదేశించారు. ఈ కార్యక్రమంలో మేఘా సంస్థ మేనేజర్ సువి రావ్, జిల్లా ప్రజా ఆరోగ్య శాఖ సాంకేతిక అధికారి నాయక్, మున్సిపల్ అధికారులు పాల్గొన్నారు.