Betting Allegations: బెట్టింగ్ మామూల్ల దందా బట్టబయలు.. చిత్తూరు వన్‌టౌన్ సీఐ సస్పెన్షన్ కలకలం..! betting allegations chittoor one town ci maheshwara. | చిత్తూరు వార్తలు (Chittoor News)

అయితే ఇదే సమయంలో వన్‌టౌన్ సీఐ మహేశ్వర వ్యవహారం వెలుగులోకి రావడం తీవ్ర చర్చకు దారి తీసింది. ఐపీఎల్ సీజన్‌కు ముందే నగరంలోని బెట్టింగ్ నిర్వాహకులను ఆయన పిలిపించుకుని, వారి కార్యకలాపాలపై పూర్తి సమాచారం సేకరించినట్లు తెలుస్తోంది. గత అనుభవాలను గుర్తు చేస్తూ, బెట్టింగ్ ద్వారా వచ్చే లాభాలు, బుకీల వివరాలు తెలుసుకున్న ఆయన, వారి కార్యకలాపాలకు అనుమతిగా భారీ మొత్తంలో మామూల్లు తీసుకున్నారనే ఆరోపణలు వినిపిస్తున్నాయి.

ఈ సమాచారం ఉన్నతాధికారుల దృష్టికి చేరడంతో, వెంటనే చర్యలు ప్రారంభమయ్యాయి. ఇటీవల నిర్వహించిన దాడుల్లో 16 మందిని అదుపులోకి తీసుకుని విచారించగా, ఏడుగురిపై కేసులు నమోదు చేశారు. ఈ క్రమంలో సీఐ పాత్రపై కూడా ప్రత్యేకంగా విచారణ జరిపిన అధికారులు, ఆయనపై వచ్చిన ఆరోపణలను తీవ్రంగా పరిగణించి సస్పెన్షన్ వేటు వేశారు.

ఇక మహేశ్వరపై ఇది మొదటి వివాదం కాదు. గతంలో నగరిలో పనిచేసిన సమయంలో కూడా అవినీతి ఆరోపణలు ఎదుర్కొన్న ఆయనపై అప్పటి ఎమ్మెల్యే గాలి భానుప్రకాష్ ఫిర్యాదు చేయడంతో లూప్‌లైన్‌కు బదిలీ చేశారు. అనంతరం కొంతకాలానికే మళ్లీ చిత్తూరులో వన్‌టౌన్ సీఐగా నియమితులైన ఆయన, ఇప్పుడు మరోసారి వివాదాల్లో చిక్కుకుని సస్పెండ్ కావడం విశేషం.

ఈ ఘటనతో పోలీస్ శాఖలో అంతర్గత కట్టుదిట్టతపై చర్చ మొదలైంది. ఒకవైపు బెట్టింగ్‌పై కఠిన చర్యలు కొనసాగుతుండగా, మరోవైపు ఇలాంటి ఆరోపణలు రావడం ప్రజల్లో నమ్మకాన్ని దెబ్బతీసే ప్రమాదం ఉందని విశ్లేషకులు చెబుతున్నారు. ఇకపై ఇలాంటి ఘటనలు పునరావృతం కాకుండా ఉన్నతాధికారులు మరింత కఠినంగా వ్యవహరించే అవకాశాలు కనిపిస్తున్నాయి.