Andhra Pradesh: శేషాద్రి ఎక్స్‌ప్రెస్‌లో దొంగల ముఠా బీభత్సం.. 5 భోగీల్లో చైన్ స్నాచింగ్‌లు.. రూ. 17 లక్షల సొమ్ము అపహరణ! | ఆంధ్రప్రదేశ్ వార్తలు

ఈనాడు కథనం ప్రకారం.. శేషాద్రి ఎక్స్‌ప్రెస్ (రైలు నం. 17209) శనివారం రాత్రి బెంగళూరులో బయలుదేరింది. ఈ రైలు బాపట్ల స్టేషన్‌కు శనివారం రాత్రి 10:19 గంటలకే చేరుకోవాల్సి ఉంది. అయితే రైలు సుమారు మూడు గంటల ఆలస్యంగా నడుస్తుండటంతో, ఆదివారం అర్ధరాత్రి దాటాక 1:24 గంటలకు బాపట్ల వైపు వచ్చింది. అప్పటికే ప్రయాణికులందరూ గాఢ నిద్రలో ఉన్నారు. అర్ధరాత్రి 1:45 నుంచి 1:55 గంటల మధ్య, రైలు బాపట్ల జిల్లాలోని అప్పికట్ల – గుడిపూడి రైల్వే స్టేషన్ల మధ్య ప్రయాణిస్తుండగా ఈ దోపిడీ జరిగింది. దొంగల ముఠా ఒకేసారి ఎస్-4, ఎస్-7, ఎస్-11, ఎస్-12, ఎస్-18 భోగీల్లోకి ప్రవేశించింది. నిద్రిస్తున్న ఐదుగురు మహిళల మెడల నుంచి బంగారు గొలుసులను బలవంతంగా లాగారు.

మెడలో నుంచి గొలుసులు లాగడంతో ప్రయాణికులు ఒక్కసారిగా ఉలిక్కిపడి కేకలు వేశారు. అప్రమత్తమైన ప్రయాణికులు దొంగలను పట్టుకునే ప్రయత్నం చేసేలోపే, దొంగల ముఠాలోని ఒక సభ్యుడు ఏ-1 (A1) కోచ్‌లో చైన్ లాగి రైలును ఆపేశాడు. రైలు ఆగీఆగడంతోనే దొంగలంతా చీకట్లోకి దూకి పొలాల్లోకి పరారయ్యారు. బాధితులు వెంటనే రైల్వే హెల్ప్‌లైన్ నంబర్ 139కి ఫిర్యాదు చేశారు.

ఈ దోపిడీలో నరసాపురం మరియు తెనాలికి చెందిన ఐదుగురు మహిళలు తమ బంగారాన్ని కోల్పోయారు. సుమారు 120 గ్రాముల బంగారు గొలుసులు, 10 గ్రాముల వెండి ఆభరణాలను దొంగలు అపహరించారు. వీటి విలువ సుమారు రూ. 17.50 లక్షలు ఉంటుందని అంచనా. బాపట్ల రైల్వే పోలీసులు ఘటనపై కేసు నమోదు చేసి దర్యాప్తు ప్రారంభించారు.

ఈ ఘటనపై రైల్వే ఎస్పీ రాహుల్‌దేవ్ సింగ్ స్పందిస్తూ.. దోపిడీకి పాల్పడింది సుమారు పది మందితో కూడిన అంతరాష్ట్ర ముఠా అయి ఉంటుందని ప్రాథమికంగా భావిస్తున్నట్లు తెలిపారు. నిందితులను పట్టుకోవడానికి ప్రత్యేక బృందాలను రంగంలోకి దించినట్లు వెల్లడించారు. రైలు ప్రయాణాల్లో ప్రయాణికులు, ముఖ్యంగా మహిళలు అప్రమత్తంగా ఉండాలని, అనుమానిత వ్యక్తులు కనిపిస్తే వెంటనే అధికారులకు సమాచారం ఇవ్వాలని కోరారు. ఈ భారీ చోరీ ఘటనతో రైలు ప్రయాణికులు తీవ్ర ఆందోళన వ్యక్తం చేస్తున్నారు. రాత్రి సమయాల్లో రైళ్లలో భద్రతను మరింత కఠినతరం చేయాలని కోరుతున్నారు.