YSRCP MLC Anantha Babu: డ్రైవర్ హత్య సుబ్రహ్మణ్యం కేసులో వైసీపీ ఎమ్మెల్సీ అనంతబాబు అరెస్ట్ | ఆంధ్రప్రదేశ్ వార్తలు

అనంతబాబు తనపై ఉన్న పాత కేసుల నిమిత్తం రాజమండ్రి కోర్టుకు హాజరై తిరిగి వెళ్తుండగా, పోలీసులు ఆయన్ను చుట్టుముట్టి అదుపులోకి తీసుకున్నారు. ఆ సమయంలో అక్కడ ఉన్న వైసీపీ నాయకులు, అనుచరులు పోలీసులను అడ్డుకునేందుకు ప్రయత్నించారు. దీంతో పోలీసులకు, వైసీపీ శ్రేణులకు మధ్య వాగ్వివాదం చోటుచేసుకుంది. పరిస్థితి ఉద్రిక్తంగా మారుతుండటంతో పోలీసులు లాఠీలకు పనిచెప్పి నిరసనకారులను చెదరగొట్టారు. అనంతరం అనంతబాబును ప్రత్యేక వాహనంలో కాకినాడలోని సర్పవరం పోలీస్ స్టేషన్‌కు తరలించారు.

ఈ అరెస్టుకు దారితీసిన అసలు కారణం సాక్షులపై జరిగిన ఒత్తిడి. డ్రైవర్ సుబ్రహ్మణ్యం హత్య కేసులో ప్రధాన సాక్షులుగా ఉన్న అరవ దుర్గ శివప్రసాద్, అరవ మణికంఠ, శబలం పవన్ కుమార్, ముమ్మిడి వెంకటేశ్‌లను అనంతబాబు అనుచరులు ఇటీవల బలవంతంగా కిడ్నాప్ చేశారనే ఆరోపణలు ఉన్నాయి. వారిని కాకినాడలోని ఒక ప్రైవేట్ అపార్ట్‌మెంట్‌లో బంధించి, కోర్టులో అనంతబాబుకు అనుకూలంగా సాక్ష్యం చెప్పాలని, లేనిపక్షంలో ప్రాణాలతో వదలబోమని తీవ్రంగా బెదిరించినట్లు పోలీసులు ప్రాథమిక విచారణలో గుర్తించారు.

సాక్షులను బెదిరించిన ఉదంతంపై పక్కా ఆధారాలు సేకరించిన పోలీసులు, వెంటనే క్రిమినల్ కేసు నమోదు చేశారు. అంతేకాకుండా, నిబంధనలను ఉల్లంఘించి సాక్షులను ప్రభావితం చేస్తున్నందున అనంతబాబుకు గతంలో మంజూరైన బెయిల్‌ను రద్దు చేయాలని కోరుతూ కోర్టులో పిటిషన్ దాఖలు చేశారు. ఈ పిటిషన్‌పై కోర్టులో వాదనలు ముగిసిన వెంటనే పోలీసులు రంగంలోకి దిగి ఆయనను అరెస్ట్ చేశారు. ప్రస్తుతం సర్పవరం పోలీస్ స్టేషన్‌లో ఆయనను విచారిస్తున్న అధికారులు, అనంతరం మేజిస్ట్రేట్ ముందు ప్రవేశపెట్టే అవకాశం ఉంది.