Last Updated:
తిరుపతి శ్రీ కోదండ రామస్వామి ఆలయంలో మే నెలంతా TTD ఆధ్వర్యంలో పౌర్ణమి కలశాభిషేకాలు, శనివారాల విశేష పూజలు, హనుమజ్జయంతి, హనుమంత వాహనం, సీతారాముల కల్యాణం నిర్వహణ
తిరుపతి నగరంలో కొలువై ఉన్న పురాతన, అత్యంత మహిమాన్వితమైన క్షేత్రం శ్రీ కోదండ రామస్వామివారి ఆలయం. ఆధ్యాత్మికతకు నెలవైన ఈ ఆలయంలో మే నెలలో భక్తుల కోసం తిరుమల తిరుపతి దేవస్థానం (TTD) అనేక విశేష ఉత్సవాలను నిర్వహించేందుకు సిద్ధమైంది.
వేసవి కాలంలో వచ్చే ఈ వేడుకలు భక్తులకు ఆధ్యాత్మిక అమృతాన్ని పంచడమే కాకుండా, ఆలయ వైభవాన్ని చాటిచెప్పనున్నాయి. మే నెలలో జరగబోయే ఆ విశేష కార్యక్రమాల సమగ్ర వివరాలు ఇక్కడ ఉన్నాయి. మే నెలలో రెండు సార్లు పౌర్ణమి ఘడియలు రావడం విశేషం. మే 1వ తేదీ, మే 31వ తేదీల్లో పౌర్ణమిని పురస్కరించుకుని ఆలయంలో అష్టోత్తర శతకలశాభిషేకం వైభవంగా జరగనుంది.
ఉదయం 9.30 గంటలకు 108 కలశాలతో స్వామివారికి అభిషేకం నిర్వహిస్తారు. వేద మంత్రోచ్ఛారణల మధ్య జరిగే ఈ ఘట్టం భక్తులకు కనువిందు చేస్తుంది. సాయంత్రం 5.30 గంటలకు శ్రీ సీతా లక్ష్మణ సమేత శ్రీ కోదండరామస్వామివారు సర్వాలంకార భూషితులై ఆలయ నాలుగు మాడ వీధుల్లో విహరిస్తారు. భక్తులు తమ ఇంటి ముంగిటకే వచ్చే స్వామివారికి కర్పూర హారతులు సమర్పించే అవకాశం ఉంటుంది.
శనివారాల ప్రత్యేకత: మే నెలలో వచ్చే ప్రతి శనివారం (మే 2, 9, 16, 23, 30) స్వామివారికి విశేష పూజలు జరుగుతాయి. శనివారం ఉదయం 6 గంటలకు గర్భాలయంలోని శ్రీ సీతారామ లక్ష్మణుల మూలవర్లకు పాలు, పెరుగు, తేనె, చందనంతో శాస్త్రోక్తంగా అభిషేకం నిర్వహిస్తారు.
సాయంత్రం 5 గంటలకు ఉత్సవమూర్తులను వీధుల్లో ఊరేగించిన అనంతరం, ఆలయ ప్రాంగణంలోనే ఊంజల్ సేవ (ఉయ్యాల సేవ) నిర్వహిస్తారు. మంగళ వాయిద్యాలు, అన్నమయ్య సంకీర్తనల మధ్య స్వామివారు ఉయ్యాలలో ఊగుతూ భక్తులను మురిపిస్తారు. మే నెలలో భక్తులు ఎంతగానో ఎదురుచూసే మరికొన్ని ప్రధాన ఘట్టాలు ఉన్నాయి.
మే 8 – ఆస్థానం: ఉదయం 8 గంటలకు అన్నమాచార్య కళామందిరంలో శ్రీ కోదండరామస్వామివారి ఆస్థానం ఘనంగా జరుగనుంది.
మే 12 – హనుమజ్జయంతి: రాముని పరమ భక్తుడైన హనుమంతుని జన్మదినోత్సవం సందర్భంగా ఆలయంలో ప్రత్యేక పూజలు, వడమాల సమర్పణ వంటి కార్యక్రమాలు ఉంటాయి.
మే 16 – అమావాస్య & హనుమంత వాహనం: అమావాస్యను పురస్కరించుకుని ఉదయం సహస్ర కలశాభిషేకం నిర్వహిస్తారు. రాత్రి 7 గంటలకు స్వామివారు తన ప్రియ భక్తుడైన హనుమంతుని వాహనంపై ఊరేగుతూ భక్తులకు దర్శనమిస్తారు.
మే 21 – శ్రీ సీతారాముల కల్యాణం: పునర్వసు నక్షత్రం సందర్భంగా ఉదయం 11 గంటలకు స్వామివారి కల్యాణ మహోత్సవం జరగనుంది. లోకకల్యాణం కోసం జరిగే ఈ వేడుకను కళ్లారా వీక్షించడం భక్తుల పూర్వజన్మ సుకృతంగా భావిస్తారు.
Click here to add News18 as your preferred news source on Google. ఆంధ్రప్రదేశ్లోని ముఖ్యమైన వార్తలు, లేటెస్ట్ న్యూస్, స్థానిక వార్తలు, ప్రభుత్వ పథకాలు, ప్రభుత్వ ప్రకటనలు, అన్ని రాజకీయ పార్టీలకు సంబంధించిన స్టోరీలను న్యూస్18 తెలుగు ఆంధ్రప్రదేశ్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
