Life Saver: అరుదైన ఓ-నెగిటివ్ రక్తంతో 46 సార్లు ప్రాణదానం.. ఆపదలో దేవుడిలా మారిన కదిరి యువకుడు..! blood donation hero. | అనంతపురం వార్తలు (Anantapuram News)

హరీష్ కథలో గొప్పదనం ఏమిటంటే.. ఆయన వద్ద ఉన్నది డబ్బు కాదు, కానీ ప్రాణాలు కాపాడే విలువైన రక్తం. నేను ఆర్థికంగా అంత బలంగా లేను. కానీ నా తల్లిదండ్రులు ఇచ్చిన రక్తమే నా సంపద. సరైన సమయంలో రక్తం అందక ఎంతో మంది ప్రాణాలు కోల్పోతున్నారు. నేను డబ్బుతో సహాయం చేయలేను, కానీ నా రక్తంతో ఒక ప్రాణాన్ని కాపాడగలను అని హరీష్ చెప్పిన మాటలు ప్రతి ఒక్కరినీ ఆలోచింపజేస్తాయి.

O- నెగిటివ్ బ్లడ్ గ్రూప్ అత్యంత అరుదైనదిగా ఉండటంతో అత్యవసర సమయాల్లో దీని అవసరం ఎక్కువగా ఉంటుంది. ఈ విషయం తెలుసుకున్న హరీష్, ఎక్కడైనా అవసరం ఉన్నప్పుడు వెంటనే స్పందించి సహాయం చేస్తున్నారు. “నా ప్రాణం ఉన్నంతవరకు వీలైనన్ని సార్లు రక్తదానం చేస్తూనే ఉంటాను అనే ఆయన సంకల్పం, సేవ పట్ల ఉన్న అంకితభావాన్ని తెలియజేస్తోంది.

ప్రత్యేకంగా డెలివరీ సమయాల్లో రక్తం అవసరం ఉన్నప్పుడు హరీష్‌కు వచ్చే ఫోన్ కాల్స్ ఆయనకు మరింత బాధ్యతను గుర్తు చేస్తాయి. అలాంటి సందర్భాల్లో వెంటనే వెళ్లి రక్తదానం చేసి, ఒక తల్లి, బిడ్డ ప్రాణాలను కాపాడిన తర్వాత వారు చూపించే ప్రేమ, కృతజ్ఞతలు ఆయనకు అమూల్యమైన బహుమతిగా మారుతాయి. వాళ్ల ఆనందం చూసినప్పుడు నా కష్టం అంతా మర్చిపోతాను అని హరీష్ చెబుతారు.

ఇప్పటికీ తన సేవను ఆపకుండా కొనసాగిస్తున్న హరీష్, అవసరంలో ఉన్నవారికి ఎప్పుడూ అందుబాటులో ఉంటున్నారు. ఆయనను సంప్రదించాలనుకునే వారు 63050 95556, 9533559838 నంబర్లకు కాల్ చేయవచ్చు. డబ్బు లేకపోయినా మనసుంటే ఎంతటి సేవ చేయవచ్చో హరీష్ జీవితం ఒక గొప్ప ఉదాహరణగా నిలుస్తోంది.