CM Chandrababu: దుబారా ఖర్చులు వద్దు.. పొదుపు ముద్దు: ప్రధాని మోదీ బాటలో సీఎం చంద్రబాబు | ఆంధ్రప్రదేశ్ వార్తలు

ఈ పొదుపు చర్యలపై రాష్ట్ర ప్రభుత్వం తరపున ఒకటి రెండు రోజుల్లో పూర్తిస్థాయి కార్యాచరణను ప్రకటిస్తామని చంద్రబాబు స్పష్టం చేశారు. యుద్ధం తెచ్చే ఇబ్బందులను అధిగమించడానికి ప్రతి ఒక్కరూ ‘నా దేశం – నా బాధ్యత’ అనే నినాదంతో ముందుకు సాగాలని ఆయన కోరారు.

వర్క్ ఫ్రమ్ హోమ్ అనేది ప్రస్తుత కాలంలో ఒక వాస్తవమని, ఇంటి నుంచే ప్రపంచం మొత్తం పనిచేసే పరిస్థితి వస్తోందని ముఖ్యమంత్రి వ్యాఖ్యానించారు. ఈ విధానాన్ని ప్రోత్సహించడం వల్ల అనవసర ప్రయాణాలు, ఇంధన ఖర్చులు తగ్గుతాయని ఆయన అభిప్రాయపడ్డారు. ప్రభుత్వ కార్యకలాపాల్లో కూడా ఈ తరహా మార్పులు తీసుకువచ్చే దిశగా ఆలోచన చేస్తున్నట్లు వెల్లడించారు. దేశం మొత్తం దుబారాను తగ్గించాల్సిన అవసరం ఉందని ఈ సందర్భంగా గుర్తుచేశారు.

విదేశీ పర్యటనలు తగ్గించుకోవాలన్న ప్రధాని సూచనను ప్రజలు పాటించాలని సీఎం కోరారు. మన దేశంలో, ముఖ్యంగా ఆంధ్రప్రదేశ్‌లో అద్భుతమైన పర్యాటక ప్రాంతాలు ఉన్నాయని, విదేశాలకు వెళ్లే బదులు స్థానిక పర్యాటక రంగాన్ని ఆదరించాలని సూచించారు. దీనివల్ల దేశ సంపద బయటకు పోకుండా ఉంటుందని చెప్పారు. ప్రధాని సూచించిన విధంగా బంగారం కొనుగోలును కూడా నియంత్రించుకోవాలని ప్రజలకు విజ్ఞప్తి చేశారు.