Buddhist site: షాకింగ్ డిస్కవరీ.. ఎవరూ ఊహించని చోట బయటపడ్డ బౌద్ధ కట్టడాలు .. వీడియో ఇదిగో..! Buddhist site Andhra Pradesh. | ఈస్ట్ గోదావరి వార్తలు (East Godavari News)

నదీ పరివాహక ప్రాంతాల్లోని కొండలపై బౌద్ధులు నివసించేవారని చరిత్ర చెబుతుంటే, అదే నిజమని ఈ తాజా కనుగొనింపు మరొకసారి నిరూపిస్తోంది. ఉమ్మడి విశాఖ, తూర్పుగోదావరి జిల్లాల్లో ఇప్పటికే బయటపడిన ఆనవాళ్ల సరసన, ఇప్పుడు గెడ్డపాలెం కొండ కూడా చేరింది. ఇటీవల అనకాపల్లి పరిసరాల్లో బయటపడ్డ అవశేషాలు మరువక ముందే, మరోసారి ఇదే జిల్లాలో చరిత్ర వెలుగులోకి రావడం విశేషం.

పాయకరావుపేట, ఎస్.రాయవరం మండలాల సమీపంలో ఉన్న గెడ్డపాలెం గ్రామం మధ్యలో ఉన్న ఈ కొండపై నాలుగు ద్వారాలతో కూడిన కట్టడాలు, స్తూపాలు కనిపించడం అందరి దృష్టిని ఆకర్షిస్తోంది. ఇక్కడ కనిపించిన ఇటుక నిర్మాణాలు, నిర్మాణ శైలి చూస్తే అవి ఎంతో ప్రాచీన కాలానికి చెందినవని నిపుణులు అంచనా వేస్తున్నారు.

ఇంతటితో ఆగిపోలేదు… ఈ కొండపై రాళ్లపై చెక్కిన బౌద్ధ రూపాలు, దైవతామూర్తుల ప్రతిరూపాలు స్పష్టంగా కనిపిస్తున్నాయి. ఇవి కేవలం కళాఖండాలు కాదు, ఆ కాలంలో ఉన్న ఆధ్యాత్మిక జీవనాన్ని ప్రతిబింబించే ముఖ్య ఆధారాలు. ప్రతి రాయి ఒక కథ చెబుతున్నట్టుగా ఈ ప్రాంతం కనిపిస్తోంది.

కొండ మధ్యలో కనిపిస్తున్న గృహాలు అయితే మరింత ఆసక్తిని రేకెత్తిస్తున్నాయి. ఇవి సాధారణ నివాసాలు కాదని, బహుశా బౌద్ధులు తమ ధ్యానం, సాధన కోసం ఉపయోగించిన ప్రదేశాలై ఉండొచ్చని అధికారులు భావిస్తున్నారు. బయటకు కనిపించకుండా ఉండేలా నిర్మించిన ఈ గృహాలు ఆ కాలపు నిర్మాణ ప్రతిభను తెలియజేస్తున్నాయి.

ఇంతకాలం గ్రామం చుట్టూ ఉండి కూడా ఎవరి దృష్టికి రాని ఈ కొండ, ఇప్పుడు ఒక్కసారిగా చారిత్రక ప్రాధాన్యతను సంతరించుకుంది. ఇటీవల గ్రామస్తులు ముళ్ళు తొలగించి దారి సిద్దం చేయడంతో ఈ ఆనవాళ్లు వెలుగులోకి వచ్చాయి. ఇంకా కొండ చుట్టూ, లోపల మరిన్ని అవశేషాలు ఉండే అవకాశముందని స్థానికులు భావిస్తున్నారు.

జాతీయ రహదారికి కేవలం రెండు కిలోమీటర్ల దూరంలో ఉన్న ఈ ప్రాంతం అభివృద్ధి చెందితే, ఇది ఒక ప్రముఖ పర్యాటక కేంద్రంగా మారే అవకాశాలు ఉన్నాయని గ్రామస్తులు చెబుతున్నారు. ఒక సాధారణ కొండలో దాగి ఉన్న ఈ చరిత్ర, ఇప్పుడు అందరినీ ఆకట్టుకుంటూ, భవిష్యత్తులో మరిన్ని రహస్యాలను బయటపెట్టబోతుందనే ఆసక్తిని కలిగిస్తోంది.