Last Updated:
AP Cabinet Meeting: అమరావతిలో సీఎం చంద్రబాబు నాయుడు నేతృత్వంలో క్యాబినెట్, పట్టణాభివృద్ధి, ఉద్యోగులు, న్యాయవ్యవస్థ, ఏపీ భవన్, హంద్రీనీవా ప్రాజెక్టు సహా పలు కీలక నిర్ణయాలు తీసుకుంది.
ఆంధ్రప్రదేశ్ రాష్ట్ర సమగ్ర అభివృద్ధే లక్ష్యంగా సీఎం చంద్రబాబు నాయుడు అధ్యక్షతన అమరావతిలోని వెలగపూడి సచివాలయంలో క్యాబినెట్ సమావేశం జరిగింది. ఉద్యోగ కల్పన, మౌలిక సదుపాయాల కల్పన, వ్యవసాయం, పట్టణాభివృద్ధి వంటి 20కి పైగా ప్రధాన అజెండా అంశాలపై ఈ భేటీలో సుదీర్ఘంగా చర్చించారు. రాష్ట్ర ప్రజల జీవన ప్రమాణాలను మెరుగుపరిచే దిశగా ప్రభుత్వం పలు సాహసోపేత నిర్ణయాలను తీసుకుని, పలు ప్రతిపాదనలకు ఆమోద ముద్ర వేసింది.
ముఖ్యంగా పట్టణాభివృద్ధి, పురపాలక పరిపాలనలో పారదర్శకతను పెంచేందుకు క్యాబినెట్ గ్రీన్ సిగ్నల్ ఇచ్చింది. మున్సిపాలిటీలకు చెందిన ఆస్తుల లీజు రెన్యువల్ (పునరుద్ధరణ) ప్రక్రియను సులభతరం చేయడంతో పాటు, అద్దె నిర్ణయ విధానాల్లో అవసరమైన సవరణలకు అంగీకారం తెలిపింది. దీనితో పాటు, రాష్ట్రంలోని అన్ని పట్టణ స్థానిక సంస్థల్లో ఆస్తుల బదిలీకి సంబంధించిన మ్యుటేషన్ ఛార్జీలను ఒకే విధంగా అమలు చేసేలా చట్ట సవరణ ప్రతిపాదనలకు ఆమోదం లభించింది. దీనివల్ల సామాన్యులకు పట్టణ ప్రాంతాల్లో ఆస్తి రిజిస్ట్రేషన్ మరియు బదిలీ ప్రక్రియ మరింత సులభతరం కానుంది.
రాష్ట్ర ప్రభుత్వ ఉద్యోగుల సంక్షేమం, పాలనను బలోపేతం చేసే దిశగా కూడా ప్రభుత్వం కీలక నిర్ణయాలు తీసుకుంది. రాష్ట్ర స్పెషల్ ప్రొటెక్షన్ ఫోర్స్ (SPF)లో 2000 బ్యాచ్కు చెందిన 385 మంది కానిస్టేబుళ్లకు హెడ్ కానిస్టేబుళ్లుగా పదోన్నతి కల్పించే ప్రతిపాదనకు క్యాబినెట్ పచ్చజెండా ఊపింది. ఇది సుదీర్ఘ కాలంగా ఎదురుచూస్తున్న పోలీసు సిబ్బందిలో ఉత్సాహాన్ని నింపనుంది. అలాగే, న్యాయవ్యవస్థలో పనిభారాన్ని తగ్గించి, సత్వర న్యాయం అందించే లక్ష్యంతో హైకోర్టు మరియు జిల్లా న్యాయస్థానాల్లో చీఫ్ కోర్టు మేనేజర్లు, సీనియర్ కోర్టు మేనేజర్లు సహా మొత్తం 21 కొత్త పోస్టుల సృష్టికి ప్రభుత్వం అంగీకరించింది.
దేశ రాజధాని ఢిల్లీలో ఆంధ్రప్రదేశ్ రాష్ట్ర ఉనికిని మరింత చాటిచెప్పేందుకు ‘ఏపీ భవన్’ నిర్మాణానికి ప్రభుత్వం ప్రాధాన్యతనిచ్చింది. కొత్త భవన నిర్మాణానికి రూ. 124.5 కోట్లు కేటాయిస్తూ క్యాబినెట్ నిర్ణయం తీసుకుంది. దీనికి తోడు ఢిల్లీలోని ఏపీ భవన్ అడ్వకేట్స్ ఆన్ రికార్డ్ కార్యాలయంలో ఆఫీస్ మేనేజర్ పోస్టును సెక్షన్ ఆఫీసర్గా అప్గ్రేడ్ చేసేందుకు ఆమోదం లభించింది. అటు గ్రామీణాభివృద్ధి శిక్షణ కోసం ఏపీ ఇన్స్టిట్యూట్ ఆఫ్ రూరల్ డెవలప్మెంట్ మరియు ఈటీసీ కేంద్రాల్లో కొత్తగా 20 పోస్టులను సృష్టించనున్నారు. మరో 9 ఆఫీస్ సబార్డినేట్ పోస్టులను అవుట్ సోర్సింగ్ పద్ధతిలో భర్తీ చేయనున్నారు.
పారిశ్రామిక, ప్రాజెక్టుల విస్తరణలో భాగంగా పలు భూ కేటాయింపులకు ప్రభుత్వం గ్రీన్ సిగ్నల్ ఇచ్చింది. ప్రకాశం జిల్లాలో ప్రతిష్టాత్మకంగా చేపట్టనున్న ఇండస్ట్రియల్ హబ్కు అవసరమైన భూములను కేటాయించేందుకు మంత్రిమండలి ఆమోదం తెలిపింది. అలాగే, కడప నగరంలో ప్రజారోగ్యం, వ్యర్థాల నిర్వహణ కోసం డంపింగ్ యార్డ్ ఏర్పాటుకు 92 ఎకరాల భూమిని కేటాయించారు. ఆధ్యాత్మిక నగరం తిరుపతిలో క్రీడలను ప్రోత్సహించే ఉద్దేశంతో స్పోర్ట్స్ స్కూలు స్థాపనకు అవసరమైన భూములను కేటాయిస్తూ నిర్ణయం తీసుకున్నారు.
రాయలసీమ వాసుల కలల ప్రాజెక్టు అయిన హంద్రీనీవా సుజల స్రవంతి ప్రాజెక్టుపై కూడా క్యాబినెట్ కీలక నిర్ణయం తీసుకుంది. పెరిగిన నిర్మాణ వ్యయం, పెండింగ్ పనుల దృష్ట్యా, ఈ ప్రాజెక్టుకు రూ. 3,099 కోట్ల సవరించిన అంచనాలకు (Revised Estimates) మంత్రిమండలి ఆమోదముద్ర వేసింది. ఈ నిధుల కేటాయింపుతో ప్రాజెక్టు పనులు వేగవంతమై సాగు మరియు తాగునీటి కష్టాలు తీరతాయని ప్రభుత్వం భావిస్తోంది. మొత్తానికి ఈ క్యాబినెట్ భేటీ రాష్ట్ర ఆర్థిక వ్యవస్థను పరుగులు పెట్టించడంతో పాటు, ఉద్యోగ, న్యాయ, మౌలిక రంగాల్లో పెను మార్పులకు నాంది పలికింది.
Click here to add News18 as your preferred news source on Google. ఆంధ్రప్రదేశ్లోని ముఖ్యమైన వార్తలు, లేటెస్ట్ న్యూస్, స్థానిక వార్తలు, ప్రభుత్వ పథకాలు, ప్రభుత్వ ప్రకటనలు, అన్ని రాజకీయ పార్టీలకు సంబంధించిన స్టోరీలను న్యూస్18 తెలుగు ఆంధ్రప్రదేశ్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
