ఈ 3 రోజుల్లో ఆ అమ్మవారిని దర్శిస్తే.. యమబాధలు కూడా దూరమవుతాయట..! talupulamma chaitra fair concluded grandly in lovakotturu. | ఈస్ట్ గోదావరి వార్తలు (East Godavari News)

కాకినాడ జిల్లా లోవ అటవీ ప్రాంతంలో ఉన్న ఈ పుణ్యక్షేత్రం రాష్ట్రంలోనే ప్రముఖ ఆధ్యాత్మిక కేంద్రంగా పేరొందింది. ఆదివారం, మంగళవారం, గురువారం వంటి ప్రత్యేక దినాల్లో లక్షలాది మంది భక్తులు ఇక్కడికి చేరుకుని అమ్మవారిని దర్శించుకుంటారు. అటవీ ప్రాంతంలోనే వంటావార్పు చేసుకుని ప్రసాదాలను స్వీకరించడం ఈ క్షేత్ర ప్రత్యేకతగా చెప్పుకోవచ్చు.

ప్రతి ఏడాది అమావాస్య సందర్భంగా సుమారు 15 రోజుల పాటు జాతర జరుగుతుండగా, అందులో ప్రధానంగా మూడు రోజులు అమ్మవారి పుట్టింటి గ్రామమైన లోవకొత్తూరులో అత్యంత ఘనంగా నిర్వహించడం సంప్రదాయంగా కొనసాగుతోంది. ఈ మూడు రోజుల్లో గ్రామం మొత్తం పండుగ వాతావరణాన్ని తలపిస్తుంది.

లోవకొత్తూరులోని ఆలయ ప్రాంగణం విద్యుత్ కాంతులతో అలంకరించబడగా, కోలాటాలు, నృత్యాలు, ప్రత్యేక వేషధారణలు జాతరను మరింత రంగురంగులంగా మార్చాయి. దేవస్థానం కార్యనిర్వాహణాధికారి, ఉప కమిషనర్ పెనుమత్సు విశ్వనాథరాజు పర్యవేక్షణలో నిర్వహించిన ఈ వేడుకలు భక్తులను విశేషంగా ఆకట్టుకున్నాయి.

జాతర చివరి రోజు నిర్వహించిన రథోత్సవం ప్రధాన ఆకర్షణగా నిలిచింది. దాదాపు 11 రథాలపై వివిధ దైవమూర్తులను ప్రతిష్టించి గ్రామమంతా ఊరేగింపుగా తీసుకెళ్లారు. ఈ దృశ్యం భక్తులకు అపూర్వ ఆధ్యాత్మిక అనుభూతిని కలిగించింది. గ్రామంలోని ప్రతి వీధిలో భక్తులు ఈ రథాలను దర్శించుకుని అమ్మవారి కటాక్షం పొందారు.

ఈ చైత్ర మాస జాతరలో అమ్మవారిని దర్శించడం ద్వారా యమబాధలు సైతం తొలగిపోతాయని ఆలయ ప్రధాన అర్చకులు త్రినాధ రావు తెలిపారు. అటవీ మధ్యలో జరిగే ఈ జాతర భక్తి, సంప్రదాయం, సంస్కృతిని ప్రతిబింబిస్తూ ప్రతి ఏటా మరింత వైభవంగా కొనసాగుతోంది.