భూమిలో వెలిసిన అమ్మవారి మహిమ.. గంధ అమావాస్య జాతరకు భక్తుల వెల్లువ..! Tuni Bhadrakali Temple. | ఈస్ట్ గోదావరి వార్తలు (East Godavari News)

సాధారణ దేవాలయాలకంటే భిన్నంగా భూమిలో నుంచే వెలిసిన ఈ దివ్య రూపం, భక్తులకు మరింత ఆత్మీయ అనుభూతిని కలిగిస్తుంది. గంధ అమావాస్య రోజున అమ్మవారిని దర్శిస్తే మాంగల్య ఫలం, ఆరోగ్యం, ఐశ్వర్యం కలుగుతాయని ఉన్న గాఢ నమ్మకంతో మహిళలు పెద్ద ఎత్తున తుని వైపు తరలివస్తున్నారు. ఒక్కరోజు దర్శనం చాలు అన్న భావనతోనే వేలాది మంది మహిళలు అమ్మవారి సన్నిధిని చేరుకుంటున్నారు.

ఈ జాతర మూడు రోజుల పాటు వైభవంగా కొనసాగనుంది. తొలిరోజు అమ్మవారి కలశ స్థాపనతో పూజలు ప్రారంభమయ్యాయని ఆలయ అర్చకులు తెలిపారు. ఉదయం నుంచే లలితా సహస్రనామ పారాయణాలతో ఆలయం మార్మోగిపోయింది. భక్తులు భక్తి పారవశ్యంలో మునిగి అమ్మవారిని ప్రార్థించారు.

జాతరలో అత్యంత ప్రత్యేక ఆకర్షణగా నిలిచేది నిండు తాంబూలం. ప్రతి ఏడాది లాగే ఈసారి కూడా మహిళలకు పసుపు, కుంకుమ, గాజులు, జాకెట్ ముక్క, అరటిపండ్లతో కూడిన తాంబూలాన్ని ఆలయ కమిటీ అందించింది. ఈ తాంబూలం స్వీకరిస్తే ఏడాదంతా అమ్మవారి కృప లభిస్తుందని, ఆరోగ్యం, ఐశ్వర్యం కలుగుతాయని భక్తులు విశ్వసిస్తున్నారు. దీంతో తాంబూలం కోసం మహిళలు పెద్ద ఎత్తున క్షేత్రానికి పోటెత్తారు.

జగత్ జనని అయిన శ్రీ భద్రకాళి అమ్మవారి సన్నిధిలో జరుగుతున్న ఈ మహోత్సవాలు భక్తులకు ఒక ఆధ్యాత్మిక అనుభూతిని అందిస్తున్నాయి. రానున్న రోజుల్లో కుంకుమ పూజలు, విశేష అభిషేకాలు, సాంస్కృతిక కార్యక్రమాలు నిర్వహించనున్నట్లు ఆలయ చైర్మన్ ఎస్.ఆర్.వి.వి. పృధ్వీరాజ్ తెలిపారు. ఏడాదికి ఒక్కసారి జరిగే ఈ గంధ అమావాస్య జాతర, భక్తుల విశ్వాసం, భక్తి, సంప్రదాయాల కలయికగా నిలుస్తోంది. “ఒక్కసారి అమ్మవారిని దర్శిస్తే చాలు.. ఏడాదంతా కాపాడుతుంది” అన్న నమ్మకంతో తుని భద్రకాళి అమ్మవారి క్షేత్రం భక్తులతో నిండిపోతోంది.