విశాఖ రైల్వే స్టేషన్‌లో బిగ్ రీలీఫ్.. రాపిడో పికప్ పాయింట్ ప్రారంభం..! special rapido pickup point opened at visakha railway station. | విశాఖపట్నం వార్తలు (Visakhapatnam News)

ఇప్పటి వరకు స్టేషన్‌ నుంచి బయటకు వచ్చిన ప్రయాణికులు రైడ్ బుక్ చేసుకునే సమయంలో అనేక ఇబ్బందులు ఎదుర్కొంటుండేవారు. ముఖ్యంగా రాపిడో వంటి ప్లాట్‌ఫారమ్‌లలో చూపించే ETA సమయం సరిగ్గా లేకపోవడం, డ్రైవర్లు ఇప్పటికే ఇతర ప్రయాణాల్లో ఉండటం వల్ల ఆలస్యాలు పెరుగుతున్నాయి. 5 నిమిషాల సమయం చూపించినా, వాస్తవానికి 15-20 నిమిషాలు వేచి చూడాల్సిన పరిస్థితులు ఏర్పడుతున్నాయి.

ఈ సమస్యలకు పరిష్కారంగా వాల్తేర్ డివిజన్ నాన్-ఫేర్ రెవెన్యూ (NFR) విధానంలో భాగంగా ప్రత్యేక రాపిడో పికప్ పాయింట్‌ను ఏర్పాటు చేసింది. దీని ద్వారా ప్రయాణికులు మరియు డ్రైవర్ల మధ్య సమన్వయం మెరుగుపడి, వేచిచూడాల్సిన సమయం గణనీయంగా తగ్గుతుంది. స్టేషన్‌కు చేరుకున్న వెంటనే రైడ్ పొందే అవకాశం ఉండటం వల్ల ప్రయాణం మరింత సులభంగా మారనుంది.

2018 నుంచి విశాఖపట్నం నగరంలో సేవలు అందిస్తున్న రాపిడో సంస్థ ఇప్పుడు ఈ కొత్త సౌకర్యంతో మరింత మంది ప్రయాణికులకు చేరువ అవుతోంది. రోజుకు సుమారు 8,000 నుంచి 10,000 మంది వరకు ఈ సౌకర్యాన్ని వినియోగించుకునే అవకాశం ఉందని అధికారులు అంచనా వేస్తున్నారు. ఇది నగరంలోని వివిధ ప్రాంతాలకు సులభమైన లాస్ట్ మైల్ కనెక్టివిటీని అందించనుంది.

ప్రయాణికుల భద్రతను కూడా ముఖ్యంగా పరిగణించినట్లు అధికారులు తెలిపారు. మహిళా ప్రయాణికుల కోసం మహిళా డ్రైవర్ల సౌకర్యం అందుబాటులో ఉండటం ప్రత్యేక ఆకర్షణగా నిలుస్తోంది. అలాగే వృద్ధులు, ప్రత్యేక అవసరాలు ఉన్నవారికి అనుభవజ్ఞులైన డ్రైవర్లు సేవలు అందించనున్నారు. మొత్తంగా ఈ కొత్త రాపిడో పికప్ సౌకర్యం విశాఖ రైల్వే స్టేషన్‌కు వచ్చే ప్రయాణికులకు సమయం ఆదా చేయడంతో పాటు, సౌకర్యవంతమైన ప్రయాణాన్ని అందించే కీలక అడుగుగా నిలుస్తోంది.