నర్సీపట్నంలో 108 అడుగుల శివపార్వతులు.. పర్యాటక హబ్‌గా మారనున్న పెద్ద చెరువు..! Narsipatnam tourism development. |

ఇందులో భాగంగా పట్టణంలోని పెద్ద చెరువును హైదరాబాద్ ట్యాంక్‌బండ్ తరహాలో అందంగా తీర్చిదిద్దాలని నిర్ణయించారు. ఇటీవల ఆర్ అండ్ బి అధికారులతో కలిసి పనులను పరిశీలించిన స్పీకర్, గతంలో ప్రభుత్వం మార్పుతో ఆగిపోయిన అభివృద్ధి పనులను మళ్లీ ప్రారంభిస్తున్నామని తెలిపారు. ముఖ్యమంత్రి చంద్రబాబు నాయుడితో చర్చించి, రోడ్డు అభివృద్ధి కోసం 3 కోట్ల 50 లక్షల రూపాయలు మంజూరు చేయించామని వెల్లడించారు.

ఈ పనులను ఏప్రిల్, మే నెలల్లోనే పూర్తి చేయాలని లక్ష్యంగా పెట్టుకున్నట్లు ఆయన పేర్కొన్నారు. సుమారు ఒక కిలోమీటర్ మేర రోడ్డు విస్తరణ చేపట్టి, మధ్యలో బ్లాక్ రోడ్డు, ప్రజలు నడవడానికి ప్రత్యేక ఫుట్‌పాత్‌లు, చెరువు వైపు కూర్చునేందుకు సౌకర్యవంతమైన ప్లాట్‌ఫారాలను ఏర్పాటు చేయనున్నట్లు వివరించారు.

పర్యాటక శాఖ ఆధ్వర్యంలో మరో 6 కోట్ల 50 లక్షల రూపాయలతో ప్రఖ్యాత గాయకులు ఘంటసాల, సుశీల విగ్రహాలను ప్రతిష్ఠించనున్నట్లు తెలిపారు. అదనంగా శివపార్వతుల విగ్రహానికి ఎదురుగా వెంకటేశ్వర స్వామి శంఖు చక్ర నామాల విగ్రహాలు, మూడు ఆకర్షణీయమైన వాటర్ ఫౌంటెన్లు కూడా ఏర్పాటు చేయనున్నారు.

సందర్శకుల కోసం టీ స్టాల్స్, చిన్న దుకాణాలు, రాత్రిపూట అందంగా మెరిసేలా విద్యుత్ దీపాలను ఏర్పాటు చేయనున్నట్లు స్పీకర్ తెలిపారు. నర్సీపట్నం ప్రజలకు ఆహ్లాదకరమైన వాతావరణాన్ని అందించడమే తమ లక్ష్యమని, ఈ అభివృద్ధి పనులకు ప్రజలందరూ సహకరించాలని ఆయన కోరారు. ఈ కార్యక్రమంలో అధికారులు, స్థానిక నాయకులు పాల్గొన్నారు.