Suicide: పెళ్లైన 22 రోజులకే భర్త అక్రమ సంబంధం బట్టబయలు.. మనస్తాపంతో నవవధువు బలవన్మరణం! | ఈస్ట్ గోదావరి వార్తలు (East Godavari News)

కాకినాడ జిల్లా కిర్లంపూడి మండలంలోని గోనేడ గ్రామానికి చెందిన సత్యంశెట్టి వెంకటలక్ష్మికి, పెద్దాపురం మండలం మర్ల గ్రామానికి చెందిన గాది కోటేశ్వరరావుతో ఏప్రిల్ 25న వివాహం జరిగింది. కుటుంబ సభ్యుల ఆశీర్వాదాల మధ్య ఘనంగా జరిగిన ఈ పెళ్లి కేవలం 22 రోజులు మాత్రమే నిలిచింది. ఆదివారం ఉదయం వెంకటలక్ష్మి తన పుట్టింట్లో ఫ్యాన్‌కు ఉరివేసుకుని బలవన్మరణానికి పాల్పడింది. విషయం బయటకు రావడంతో గ్రామంలో విషాద వాతావరణం నెలకొంది.

అయితే ఈ ఆత్మహత్య వెనుక భర్త అక్రమ సంబంధమే కారణమంటూ గ్రామంలో పెద్ద ఎత్తున ప్రచారం జరుగుతోంది. భర్తకు మరో మహిళతో సంబంధం ఉందనే విషయం పెళ్లి తర్వాత వెంకటలక్ష్మికి తెలిసిందని, ఆ విషయాన్ని ఆమె జీర్ణించుకోలేక తీవ్ర మనస్తాపానికి గురైందని కుటుంబ సభ్యులు చెబుతున్నారు. ప్రతిరోజూ ఇదే విషయంపై ఆందోళన చెందుతూ మానసికంగా కుంగిపోయిందని బంధువులు వాపోతున్నారు.

మృతురాలి బావ పాపారావు మీడియాతో మాట్లాడుతూ సంచలన విషయాలు వెల్లడించారు. వివాహానికి ముందే కోటేశ్వరరావుకు మరో మహిళతో సంబంధం ఉందని తమకు ఇప్పుడు తెలిసిందన్నారు. పెళ్లికి రెండు రోజుల ముందు కూడా ఈ అక్రమ సంబంధంపై గొడవ జరిగిందని, అయితే డబ్బులు ఇచ్చి వ్యవహారాన్ని కాంప్రమైజ్ చేసినట్లు సమాచారం వచ్చిందని చెప్పారు. మా చిట్టితల్లి ఎంతో బాధపడేది… చివరికి మమ్మల్ని వదిలేసి వెళ్లిపోయింది అంటూ ఆయన ఆవేదన వ్యక్తం చేశారు.

ఈ ఘటనపై పోలీసులు కేసు నమోదు చేసి దర్యాప్తు ప్రారంభించారు. నవవధువు కుటుంబ సభ్యుల వాంగ్మూలాలు నమోదు చేసి, భర్తతో పాటు ఇతర కోణాల్లో కూడా విచారణ చేపట్టినట్లు సమాచారం. పెళ్లి అనే పవిత్ర బంధంలో నిజాలు దాచిపెడితే ఎలాంటి విషాదాలు జరుగుతాయో ఈ ఘటన మరోసారి గుర్తు చేసిందంటూ స్థానికులు చర్చించుకుంటున్నారు.