Last Updated:
తీరా క్షేత్రానికి చేరుకున్నాక గదులు లేవని తెలియడంతో వారు రోడ్డున పడ్డారు. ఈ విషయం తెలుసుకున్న దేవస్థానం అధికారులు మానవత్వంతో స్పందించి వారికి అండగా నిలిచారు.
Srisailam: దైవ దర్శనం కోసం వచ్చే భక్తుల అమాయకత్వాన్ని ఆసరాగా చేసుకుని సైబర్ నేరగాళ్లు పడగ విప్పుతున్నారు. ప్రముఖ శైవ క్షేత్రం శ్రీశైలంలో వసతి గదుల పేరిట నకిలీ వెబ్సైట్లు సృష్టించి భక్తులను నిలువునా ముంచుతున్నారు. తాజాగా ఢిల్లీ నుంచి వచ్చిన 27 మంది యాత్రికులు ఈ కేటుగాళ్ల వలలో పడి వేల రూపాయలు నష్టపోయారు. తీరా క్షేత్రానికి చేరుకున్నాక గదులు లేవని తెలియడంతో వారు రోడ్డున పడ్డారు. ఈ విషయం తెలుసుకున్న దేవస్థానం అధికారులు మానవత్వంతో స్పందించి వారికి అండగా నిలిచారు.
ఈనాడు కథనం ప్రకారం.. ఢిల్లీలోని కృష్ణానగర్కు చెందిన ఆనంద్కుమార్ తన కుటుంబ సభ్యులు, స్నేహితులతో కలిసి మొత్తం 27 మంది మల్లన్న దర్శనం కోసం శ్రీశైలం రావాలని నిశ్చయించుకున్నారు. ఇంత పెద్ద మొత్తంలో యాత్రికులు వస్తుండటంతో వసతి కోసం ముందుగానే ఇంటర్నెట్లో గదుల వేట మొదలుపెట్టారు. గూగుల్లో వెతుకుతుండగా, దేవస్థానానికి చెందిన అధికారిక వెబ్సైట్ను పోలి ఉన్న ఒక నకిలీ వెబ్సైట్ వారికి కనిపించింది. అందులో ‘మల్లికార్జున సదన్’ పేరుతో గదులు అందుబాటులో ఉన్నట్లు, లోపల వసతులు చాలా బాగున్నట్లు ఫోటోలు ప్రదర్శించారు.
వెబ్సైట్లో ఉన్న నంబర్కు ఆనంద్కుమార్ సంప్రదించగా, సాహిల్ అనే వ్యక్తి తనను దేవస్థానం ప్రతినిధిగా పరిచయం చేసుకున్నాడు. 27 మందికి సరిపడా 9 ఏసీ గదుల కోసం సుమారు రూ.15,000 ఆన్లైన్ ద్వారా చెల్లించాలని కోరాడు. అతడి మాటలను నమ్మిన ఆనంద్కుమార్ డబ్బులు పంపారు. వెంటనే నిందితుడు ‘మల్లికార్జున సదన్ శ్రీశైలం’ పేరుతో ఒక నకిలీ రసీదును (Receipt) కూడా పంపాడు. దీంతో అంతా సవ్యంగానే ఉందని భావించిన భక్తులు ఢిల్లీ నుంచి విమానంలో హైదరాబాద్ చేరుకుని, అక్కడి నుంచి బస్సులో శనివారం శ్రీశైలం క్షేత్రానికి చేరుకున్నారు.
యాత్రికులందరూ లగేజీతో కలిసి మల్లికార్జున సదన్ రిసెప్షన్ కౌంటర్ వద్దకు వెళ్లి తమ బుకింగ్ రసీదును చూపించారు. దాన్ని పరిశీలించిన అక్కడి సిబ్బంది అది నకిలీదని తేల్చేశారు. తాము అలాంటి బుకింగ్లు ఆన్లైన్లో చేయడం లేదని, ఆ రసీదు కూడా దేవస్థానానిది కాదని చెప్పడంతో బాధితులు ఒక్కసారిగా దిగ్భ్రాంతికి గురయ్యారు. వేల మైళ్ల దూరం నుంచి వచ్చిన తమకు వసతి లేకపోవడంతో మహిళలు, పిల్లలతో యాత్రికులు తీవ్ర ఇబ్బందులు పడ్డారు. చేసేదేమీ లేక ప్రైవేట్ సత్రాల చుట్టూ తిరుగుతున్న ఈ దృశ్యాలు ఈటీవీలో ప్రసారం కావడంతో వెంటనే శ్రీశైలం దేవస్థానం ఈఓ (EO) ఎం. శ్రీనివాసరావు స్పందించారు.
బాధితుల పరిస్థితిని చూసి చలించిన ఈఓ, తక్షణమే వారికి ఉచిత వసతి కల్పించాలని ఆదేశించారు. వారికి దేవస్థానం తరఫున బీఆర్సీ (BRC) కాటేజీలో గదులు కేటాయించడమే కాకుండా, సాయంత్రం వేళ ఉచిత దర్శనం, భోజన సదుపాయాలు కల్పించి మానవత్వం చాటుకున్నారు. ఈ విచారకరమైన ఘటనపై బాధితుడు ఆనంద్కుమార్ నుంచి లిఖితపూర్వక ఫిర్యాదును స్వీకరించారు. భక్తులను మోసం చేసిన సైబర్ నేరగాళ్లపై కఠిన చర్యలు తీసుకోవాలని పోలీసులకు ఫిర్యాదు చేసినట్లు ఈఓ తెలిపారు.
శ్రీశైలం లేదా ఇతర పుణ్యక్షేత్రాలకు వెళ్లే భక్తులు వసతి మరియు దర్శన టిక్కెట్ల కోసం కేవలం దేవస్థానం అధికారిక వెబ్సైట్లనే ఉపయోగించాలని అధికారులు కోరుతున్నారు. గూగుల్లో కనిపించే ప్రతి ఫోన్ నంబర్ను నమ్మవద్దని, ఆన్లైన్ పేమెంట్లు చేసే ముందు ఒకటికి రెండుసార్లు సరిచూసుకోవాలని సూచిస్తున్నారు. అపరిచిత వ్యక్తులకు నగదు బదిలీ చేసి మోసపోవద్దని హెచ్చరిస్తున్నారు.
Click here to add News18 as your preferred news source on Google. ఆంధ్రప్రదేశ్లోని ముఖ్యమైన వార్తలు, లేటెస్ట్ న్యూస్, స్థానిక వార్తలు, ప్రభుత్వ పథకాలు, ప్రభుత్వ ప్రకటనలు, అన్ని రాజకీయ పార్టీలకు సంబంధించిన స్టోరీలను న్యూస్18 తెలుగు ఆంధ్రప్రదేశ్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
