Natural Disaster: అల్లూరి జిల్లాలో ఘోర ప్రమాదం.. చెట్టు కూలి ఇద్దరు మహిళలు అక్కడికక్కడే మృతి! |

పెదబయలు మండలంలోని పాత ఎంపీడీఓ కార్యాలయం సమీపంలో ప్రతి వారం జరిగే సంతకు సంబంధించి వ్యాపారాలు జోరుగా సాగుతున్నాయి. మృతులు ఒడిశా రాష్ట్రం జర్రయి గ్రామానికి చెందిన మహిళలుగా గుర్తించారు. వీరు వృత్తిరీత్యా కూరగాయల వ్యాపారులు. పొరుగు రాష్ట్రం నుంచి వచ్చి ఇక్కడ కూరగాయలు అమ్ముకుంటూ జీవనం సాగిస్తున్నారు. ఎప్పటిలాగే ఈరోజు వ్యాపారం నిమిత్తం వారు సంత వద్దకు చేరుకున్నారు.

అయితే, ఒక్కసారిగా వాతావరణం మారిపోయింది. ఆకాశం మేఘావృతమై బలమైన ఈదురు గాలులతో కూడిన భారీ వర్షం ప్రారంభమైంది. గాలి తీవ్రతకు తట్టుకోలేక అక్కడే ఉన్న ఒక భారీ వృక్షం అకస్మాత్తుగా వేర్లతో సహా ఊడి పక్కనే ఉన్న మహిళలపై పడింది. ఆ సమయంలో ఆ చెట్టు కింద ఉన్న ఇద్దరు మహిళలు చెట్టు కొమ్మల కింద చిక్కుకుపోయారు. ఆ బరువును తట్టుకోలేక, తీవ్ర గాయాలవ్వడంతో వారు ఘటనా స్థలంలోనే ప్రాణాలు విడిచారు.

చెట్టు కూలిన శబ్దం విన్న వెంటనే స్థానిక ప్రజలు, ఇతర వ్యాపారులు ఘటనా స్థలానికి పరుగులు తీశారు. సహాయక చర్యలు చేపట్టే లోపే మహిళలు మృతి చెందడంతో అందరూ దిగ్భ్రాంతికి గురయ్యారు. సమాచారం అందుకున్న పెదబయలు మండల అధికారులు పోలీసులు వెంటనే అక్కడికి చేరుకున్నారు. భారీ వృక్షం కావడంతో కొమ్మలను తొలగించి మృతదేహాలను బయటకు తీయడానికి సిబ్బంది తీవ్రంగా శ్రమించాల్సి వచ్చింది.

బతుకుదెరువు కోసం పొరుగు రాష్ట్రం నుంచి వచ్చి, ఆరుగాలం శ్రమించి పండించిన కూరగాయలను అమ్ముకుందామనుకున్న ఆ మహిళలు ఇలా విగతజీవులుగా మారడం అందరినీ కలిచివేసింది. వారి కుటుంబాలకు సమాచారం అందించేందుకు అధికారులు ప్రయత్నిస్తున్నారు. ఈ ఘటనతో పెదబయలు సంత ప్రాంతంలో విషాద వాతావరణం నెలకొంది.