Last Updated:
నరసరావుపేట బుకీల వ్యవహారం ఇప్పుడు నగరంలో తీవ్ర సంచలనంగా మారింది. బాధితుడి ఫిర్యాదుతో రంగంలోకి దిగిన పోలీసులు ఒక నిందితుడిని అరెస్ట్ చేయగా, ప్రధాన బుకీ పరారీలో ఉన్నాడు.
Narasaraopeta: ఆన్లైన్ ట్రేడింగ్ పేరిట అమాయకులకు వల వేసి, రూ.కోట్లలో పెట్టుబడులు పెట్టించి.. చివరకు ఆ సొమ్మును క్రికెట్ బెట్టింగులకు మళ్లిస్తున్న ఒక అంతర్రాష్ట్ర ముఠా గుట్టును పల్నాడు జిల్లా నరసరావుపేట పోలీసులు రట్టు చేశారు. షేర్ మార్కెట్ ట్రేడింగ్లో భారీ లాభాలు వస్తాయంటూ విజయవాడకు చెందిన వీరాంజనేయులు అనే వ్యక్తిని నమ్మించి, ఏకంగా రూ.1.44 కోట్ల రూపాయలు దండుకున్న నరసరావుపేట బుకీల వ్యవహారం ఇప్పుడు నగరంలో తీవ్ర సంచలనంగా మారింది. బాధితుడి ఫిర్యాదుతో రంగంలోకి దిగిన పోలీసులు ఒక నిందితుడిని అరెస్ట్ చేయగా, ప్రధాన బుకీ పరారీలో ఉన్నాడు.
నరసరావుపేట రెండో పట్టణ (టూ-టౌన్) పోలీస్ స్టేషన్ సీఐ ప్రభాకర్ తెలిపిన వివరాల ప్రకారం.. నరసరావుపేట పట్టణానికి చెందిన ‘గోల్డ్ శేఖర్’ అలియాస్ శేఖర్ మరియు అతని స్నేహితుడు రవితేజలు కలిసి ఈ మోసానికి తెరలేపారు. వీరికి విజయవాడకు చెందిన వీరాంజనేయులుతో గతంలో పరిచయం ఏర్పడింది. దీనిని ఆసరాగా చేసుకుని, తాము ఆన్లైన్ ట్రేడింగ్లో రూ.కోట్లు గడిస్తున్నామని, తమ వద్ద పెట్టుబడి పెడితే అతి తక్కువ కాలంలోనే రెట్టింపు లాభాలు వస్తాయని వీరాంజనేయులుకు నమ్మబలికారు.
వారి మాటలను నిజమని నమ్మిన బాధితుడు వీరాంజనేయులు, విడతల వారీగా దాదాపు రూ.1.44 కోట్ల భారీ మొత్తాన్ని గోల్డ్ శేఖర్ కు చెందిన వివిధ బ్యాంక్ ఖాతాలలో జమ చేశాడు. అయితే, డబ్బులు అందిన కొద్దిరోజులకే నిందితులు ఇద్దరూ తమ అసలు రంగు బయటపెట్టారు.
పెట్టుబడి పెట్టి నెలలు గడుస్తున్నా లాభాల మాట దేవుడెరుగు, కనీసం అసలు డబ్బుల గురించి కూడా నిందితుల నుండి ఎటువంటి స్పందన లేకపోవడంతో బాధితుడు వీరాంజనేయులు నరసరావుపేటకు వచ్చి వారిని నిలదీశాడు. దీంతో నిందితులు ఇద్దరూ బాధితుడిపై ఎదురుదాడికి దిగారు. “నువ్వు ఇచ్చిన డబ్బులను ట్రేడింగ్లో పెట్టాం.. అక్కడ భారీగా నష్టాలు వచ్చాయి.. ఇప్పుడు నీకు పైసా కూడా ఇవ్వలేం, ఏం చేసుకుంటావో చేసుకో” అంటూ తీవ్రస్థాయిలో బెదిరింపులకు పాల్పడ్డారు.
తాను మోసపోయానని గ్రహించిన బాధితుడు వెంటనే నరసరావుపేట టూ-టౌన్ పోలీస్ స్టేషన్లో రాతపూర్వకంగా ఫిర్యాదు చేశాడు. కేసు నమోదు చేసుకుని దర్యాప్తు చేపట్టిన పోలీసులకు విచారణలో విస్తుపోయే నిజాలు తెలిశాయి. బాధితుడు ట్రేడింగ్ కోసం ఇచ్చిన రూ.1.44 కోట్ల సొమ్మును నిందితులు అసలు షేర్ మార్కెట్లోనే పెట్టలేదని తేలింది. ఆ నగరంతటినీ వారు క్రికెట్ బెట్టింగులకు, ఆన్లైన్ గేమింగ్లకు మళ్లించినట్లు పోలీసులు సాంకేతిక ఆధారాలు (Bank Transactions) సేకరించారు.
పోలీసుల లోతైన దర్యాప్తులో గోల్డ్ శేఖర్ ఒక పెద్ద క్రికెట్ బుకీ అని, అతను సాధారణ ప్రజల ఐడీలను ఉపయోగించి ‘మూల్ ఖాతాలు’ (దొంగ బ్యాంక్ ఖాతాలు) నిర్వహిస్తున్నట్లు గుర్తించారు. ఈ ఖాతాల ద్వారానే కోట్ల రూపాయల బెట్టింగ్ సొమ్మును ఇతర రాష్ట్రాలకు సైతం మళ్లిస్తూ పెద్ద నెట్వర్క్ నడుపుతున్నాడు. ఈ క్రమంలోనే గోల్డ్ శేఖర్ను ఇటీవల ప్రకాశం జిల్లా దర్శి పోలీసులు ఒక భారీ బెట్టింగ్ కేసులో అరెస్ట్ చేశారు. అయితే, ఆ కేసులో రిమాండ్ ముగిసిన తర్వాత బెయిల్ పై బయటకు వచ్చిన శేఖర్, ప్రస్తుత నరసరావుపేట కేసు ఐడియా రావడంతో ముందస్తుగా పరారయ్యాడు.
ప్రస్తుతం పోలీసులు ఈ కేసులో రెండో నిందితుడైన రవితేజను అత్యంత వ్యూహాత్మకంగా అదుపులోకి తీసుకుని, కోర్టులో హాజరుపరిచి రిమాండ్కు తరలించారు. పరారీలో ఉన్న ప్రధాన బుకీ గోల్డ్ శేఖర్ కోసం ప్రత్యేక బృందాలను రంగంలోకి దించి గాలింపు ముమ్మరం చేసినట్లు సీఐ ప్రభాకర్ తెలిపారు. ప్రజలు ఇలాంటి నకిలీ ట్రేడింగ్ బ్రోకర్లను, అనధికారిక వ్యక్తులను నమ్మి లక్షలాది రూపాయలు పోగొట్టుకోవద్దని పల్నాడు జిల్లా పోలీసులు హెచ్చరిస్తున్నారు.
Click here to add News18 as your preferred news source on Google. ఆంధ్రప్రదేశ్లోని ముఖ్యమైన వార్తలు, లేటెస్ట్ న్యూస్, స్థానిక వార్తలు, ప్రభుత్వ పథకాలు, ప్రభుత్వ ప్రకటనలు, అన్ని రాజకీయ పార్టీలకు సంబంధించిన స్టోరీలను న్యూస్18 తెలుగు ఆంధ్రప్రదేశ్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
