Giddalur: కంచె చేను మేస్తే.. అడవిని కాపాడాల్సిన వారే కాజేశారు.. గిద్దలూరు డివిజన్‌లో అటవీ అధికారుల ‘గుప్త నిధుల’ గుట్టు రట్టు! | ఆంధ్రప్రదేశ్ వార్తలు

నల్లమల అటవీ ప్రాంతంలోని గిద్దలూరు టైగర్ ప్రాజెక్టు డివిజన్, తురిమెళ్ల అటవీక్షేత్ర పరిధిలోని ఆరవీటికోట సెక్షన్‌లో ఈ అక్రమ తవ్వకాల పర్వం సాగింది. ఇక్కడి యర్రగుంట్ల క్షేత్రీయం భూముల్లోని ‘బీగినపల్లి కుంట’ పరిసరాల్లో వందల ఏళ్ల నాటి ప్రాచీన గుప్త నిధులు ఉన్నట్లు యర్రగొండపాలెంకు చెందిన ఒక అంతర్రాష్ట్ర గుప్తనిధుల ముఠాకు సమాచారం అందింది. అయితే, అభయారణ్యంలోకి సామాన్యులు వెళ్లడం, తవ్వకాలు జరపడం అసాధ్యం కావడంతో, ఆ ముఠా నేరుగా స్థానిక అటవీ అధికారులనే సంప్రదించి వారికి భారీగా వాటాలు ఇస్తామని ఎర వేసింది.

నల్లమల గుండెల్లో జరిపిన ఈ సుదీర్ఘ తవ్వకాల్లో పురాతన కాలం నాటి రెండు పెద్ద మట్టి కుండలు లభ్యమయ్యాయి. విశ్వసనీయ సమాచారం ప్రకారం.. ఆ కుండల నిండా కోట్ల రూపాయల విలువైన నిఖార్సయిన లంకె బిందెల బంగారం, అరుదైన వజ్రాలు, ప్రాచీన నాణేలు ఉన్నట్లు తెలుస్తోంది. నిధులు దొరికిన ఆనందంలో సదరు అటవీ అధికారులు నియంత్రణ కోల్పోయారు. తాము చేసిన నేరాన్ని మర్చిపోయి, ప్రభుత్వ వాహనంపైనే ఆ విలువైన కుండలను ఉంచి, వాటిపై కూర్చుని ఫోటోలు, వీడియోలు తీసుకున్నారు. ఆపై వాటిని తమ వ్యక్తిగత సామాజిక మాధ్యమాల (Social Media) ఖాతాల్లో స్వయంగా పోస్ట్ చేసుకోవడం గమనార్హం. ఈ ఫోటోలే ఇప్పుడు వారి మెడకు ఉచ్చులా మారాయి.

కుండల్లో దొరికిన విలువైన సొత్తును నగదు రూపంలోకి మార్చుకోవడానికి నిందితులు స్కెచ్ వేశారు. ఏప్రిల్ 22వ తేదీన ఈ సొత్తును విక్రయించేందుకు మొదట హైదరాబాద్‌లోని కొంతమంది పెద్ద వ్యాపారులను సంప్రదించారు. అయితే అక్కడ నకిలీ నిధుల ముఠా అనే అనుమానంతో డీల్ కుదరకపోవడంతో ప్లాన్ ఫెయిల్ అయింది. దీంతో ఏమాత్రం వెనక్కి తగ్గని అటవీ అధికారులు, గుప్తనిధుల ముఠాతో కలిసి పొరుగు రాష్ట్రమైన కర్ణాటకలోని బెంగళూరుకు తరలించారు. అక్కడ రహస్యంగా కోట్లాది రూపాయలకు ఆ విలువైన వజ్రాలు, బంగారాన్ని విక్రయించి సొమ్ము చేసుకున్నట్లు గట్టిగా ప్రచారం సాగుతోంది.

అడవిలో జేసీబీలతో తవ్వకాలు జరిగిన విషయం ఆలస్యంగా అర్ధవీడు పోలీసుల దృష్టికి వెళ్ళింది. రంగంలోకి దిగిన పోలీసులు ప్రాథమిక దర్యాప్తు చేపట్టగా.. అటవీ అధికారుల నిర్వాకం మొత్తం బయటపడింది. అయితే, ఈ కేసును ముందే పసిగట్టిన అటవీ శాఖ అధికారులు, భారీగా లభించిన సొమ్ములో కొంత భాగాన్ని పోలీసులకు ఎరగా వేసి, దర్యాప్తును తమకు అనుకూలంగా తిప్పుకున్నట్లు అటవీ గ్రామాల ప్రజలు బహిరంగంగా ఆరోపిస్తున్నారు.