పథకానికి సంబంధించిన అర్హతలను కూడా ప్రభుత్వం స్పష్టంగా నిర్ధారించినట్లు తెలుస్తోంది. డ్వాక్రా సంఘంలో కనీసం ఆరేళ్లు పూర్తి చేసుకున్న సభ్యురాళ్ల కుమార్తెల వివాహాలకు మాత్రమే ఈ రుణం మంజూరు చేస్తారు. లబ్ధిదారులు తమ అవసరాన్ని బట్టి రూ. 10 వేల నుండి రూ. 1 లక్ష వరకు 4 శాతం రాయితీ వడ్డీ రేటుతో ఈ రుణాన్ని పొందవచ్చు. తీసుకున్న మొత్తాన్ని గరిష్టంగా 48 నెలవారీ వాయిదాలలో తిరిగి చెల్లించే వెసులుబాటు కల్పించారు. అయితే, ఈ పథకం పొందేందుకు ఒక ముఖ్యమైన నిబంధనను కూడా అధికారులు చేర్చారు. గతంలో స్త్రీనిధి, బ్యాంకు లింకేజీ లేదా ఉన్నతి వంటి పథకాల ద్వారా తీసుకున్న రుణాలను సక్రమంగా, గడువులోపు చెల్లించే వారికి మాత్రమే ఈ ‘కల్యాణ లక్ష్మి’ రుణం మంజూరు చేస్తారు. అంటే, క్రమం తప్పకుండా అప్పులు తీరుస్తూ ఆర్థిక క్రమశిక్షణ పాటించే మహిళలకు ఇది ఒక ప్రోత్సాహకంలా పనిచేస్తుంది.
