Andhra University: సచిన్ చెప్పిన సక్సెస్ మంత్రం.. ఏయూ వేదికగా యువతకు సూచనలు | ఆంధ్రప్రదేశ్ వార్తలు

ఈ ముగింపు ఉత్సవాలకు భారత ఉప రాష్ట్రపతి సి.పి. రాధాకృష్ణన్ ముఖ్య అతిథిగా హాజరవగా, ఆంధ్రప్రదేశ్ ముఖ్యమంత్రి నారా చంద్రబాబు నాయుడు, మాజీ ఉపరాష్ట్రపతి ముప్పవరపు వెంకయ్యనాయుడు, ఏపీ, ఒడిశా గవర్నర్లు అబ్దుల్ నజీర్, కంభంపాటి హరిబాబు తదితర ప్రముఖులు పాల్గొన్నారు. వీరితో పాటు కేంద్ర మంత్రులు కింజరాపు రామ్మోహన్ నాయుడు, భూపతిరాజు శ్రీనివాస వర్మ, పెమ్మసాని చంద్రశేఖర్ కూడా విచ్చేశారు. సుమారు 25 వేల మందికి పైగా విద్యార్థులు, పూర్వ విద్యార్థులు మరియు అధ్యాపకులు ఈ వేడుకలకు సాక్ష్యంగా నిలిచారు.

వేదికపై ప్రసంగించిన సచిన్ టెండూల్కర్ తన జీవిత ప్రయాణంలోని మలుపులను వివరిస్తూ యువతకు అత్యంత స్ఫూర్తిదాయకమైన సందేశాన్ని అందించారు. తాను కూడా చాలా సాధారణ కుటుంబం నుంచే వచ్చానని, చిన్నతనంలో తమ కుటుంబమంతా కేవలం రెండు గదుల ఇంట్లోనే సర్దుకునేవాళ్లమని ఆయన తన గతాన్ని గుర్తు చేసుకున్నారు. తన తండ్రి ఒక ప్రొఫెసర్ అని, ఆయనకు పుస్తకాలన్నా, చదువన్నా అమితమైన ఇష్టమని పేర్కొంటూ.. విజ్ఞానానికి మరియు క్రమశిక్షణకు ఉన్న ప్రాధాన్యతను సచిన్ నొక్కి చెప్పారు.

క్రికెట్‌లో తన ఎదుగుదల మరియు తండ్రి నేర్పిన పాఠాల గురించి చెబుతూ సచిన్ ఒక ఆసక్తికర సంఘటనను పంచుకున్నారు. “నేను క్రికెట్‌లో నిలదొక్కుకున్న తర్వాత తొలిసారి కారు కొనుక్కున్నాను. ఆ సమయంలో కారులో భారీ శబ్దంతో సంగీతం వింటూ ఆనందించేవాడ్ని. నా తండ్రి పక్కనే కూర్చుని పుస్తకం చదువుకుంటున్నప్పటికీ, ఒక్కసారి కూడా సౌండ్ తగ్గించమని నన్ను అడగలేదు. అది ఆయనకు తన పని పట్ల ఉన్న ఏకాగ్రతకు నిదర్శనం” అని సచిన్ అన్నారు. ఏ రంగంలోనైనా పని పట్ల ఏకాగ్రత పెంచుకుంటే, బాహ్య మరియు అంతర్గత ఒత్తిడిని సులభంగా అధిగమించవచ్చని ఆయన యువతకు సూచించారు.

విజయం సాధించే క్రమంలో ఎదురయ్యే భయాలు, అనుమానాలపై సచిన్ స్పందిస్తూ.. ఆత్మవిశ్వాసమే మన అసలైన ఆయుధమని చెప్పారు. “నెట్స్‌లో కఠోరంగా సాధన చేయడం వల్లే నేను క్రికెట్‌లో ఉన్నత స్థానానికి చేరుకోగలిగాను. మైదానంలో బౌలర్ ఎలాంటి బంతి వేస్తాడో మనం ముందుగా ఊహించలేం, కానీ ఆ అనిశ్చితిని ఎదుర్కోవడానికి మనం సిద్ధంగా ఉండాలి” అని ఆయన విశ్లేషించారు. యువత తమ లక్ష్యాలను చేరుకునే ప్రయాణంలో ఎదురయ్యే అడ్డంకులను చూసి వెనకడుగు వేయకుండా, నిరంతర శ్రమతో ముందుకు సాగాలని పిలుపునిచ్చారు.