East Godavari: తూర్పు గోదావరిలో దారుణం.. భార్యపై కక్షతో నాలుగేళ్ల కన్నకూతురిని బావిలో పడేసి చంపిన భర్త | ఈస్ట్ గోదావరి వార్తలు (East Godavari News)

భార్య తన దగ్గరకు రాకపోవడంతో రాజు ఆమెపై మరింత కక్ష పెంచుకున్నాడు. “నువ్వు కాపురానికి రాకపోతే పిల్లలను చంపేస్తా” అంటూ నిరంతరం ఫోన్లలో బెదిరింపులకు దిగేవాడు. అనంతరం గ్రామ పెద్దలు సమక్షంలో పంచాయితీ నిర్వహించి, రాజుకు సర్దిచెప్పడంతో నీలిమ మళ్లీ భర్త వద్దకు కాపురానికి వచ్చింది. అయినా రాజు ప్రవర్తనలో ఎలాంటి మార్పు రాలేదు సరే కదా, వేధింపులు మరింత ఎక్కువయ్యాయి.

గతంలోనే ఒకసారి హత్యాయత్నం.. తమ్ముడు అడ్డుకోవడంతో తప్పిన ప్రమాదం

రాజు ఎంతటి క్రూరత్వానికి సిద్ధపడ్డాడనేదానికి ఒక వారం క్రితం జరిగిన ఘటనే సాక్ష్యం. వారం రోజుల క్రితం కూడా రాజు తన చిన్న కుమార్తె లహరిని చంపాలనే ఉద్దేశంతో బావి వద్దకు తీసుకువెళ్లాడు. అయితే, ఆ సమయంలో రాజు సోదరుడు సురేంద్ర అది గమనించి, తమ్ముడిని గట్టిగా మందలించి చిన్నారిని కాపాడాడు. ఈ క్రమంలో గురువారం రాత్రి నీలిమ ఒక పనిమీద పాలవడ్ల గ్రామానికి వెళ్లగా, ఇద్దరు పిల్లలు ఇంట్లోనే ఉన్నారు. రాత్రి సమయంలో విపరీతంగా మద్యం తాగి ఇంటికి వచ్చిన రాజు, మంచంపై గాఢనిద్రలో ఉన్న తన నాలుగేళ్ల చిన్న కుమార్తె లహరిని ఎత్తుకెళ్లి గ్రామ శివారులోని బావిలో పడేసి, ఏమీ తెలియనట్లు అక్కడి నుంచి బయటకు వెళ్లిపోయాడు.

కన్నకూతురిని బావిలో పడేసి చంపిన రాజుపై కోరుకొండ పోలీసులు హత్య కేసు నమోదు చేసి, నిందితుడిని అదుపులోకి తీసుకున్నారు. శనివారం చిన్నారి మృతదేహానికి రాజమహేంద్రవరం ప్రభుత్వ ఆసుపత్రిలో పోస్టుమార్టం నిర్వహించి కుటుంబ సభ్యులకు అప్పగించారు. “నా భర్త పిల్లలను తనతో ఉంచుకోకుండా ఇబ్బంది పెడుతున్నాడని పోలీసులకు ఫిర్యాదు చేసినా పట్టించుకోలేదు, ఈలోగానే నా బిడ్డను చంపేశాడు” అంటూ తల్లి నీలిమ రోదించడం స్థానికులను కన్నీరు పెట్టించింది. ఈ ఘటనపై పోలీసులు పూర్తిస్థాయి దర్యాప్తు జరుపుతున్నారు.