Last Updated:
యానం లో మంత్రి అయిన Malladi Krishna Rao కు ఘన స్వాగతం, భారీ ర్యాలీలు, గోదావరిలో మత్స్యకారుల పడవలతో ప్రత్యేక స్వాగతం, అభివృద్ధి హామీలతో ప్రజల్లో ఉత్సాహం
కేంద్రపాలిత ప్రాంతమైన యానం శుక్రవారం సంబరాలతో కళకళలాడింది. యానం ఎమ్మెల్యే Malladi Krishna Rao మంత్రిగా ప్రమాణ స్వీకారం చేసిన అనంతరం తొలిసారి సొంత గడ్డపై అడుగుపెట్టడంతో ప్రజలు భారీ ఎత్తున తరలివచ్చి ఘన స్వాగతం పలికారు. వీధులన్నీ అభిమానులతో నిండిపోగా, యానం మొత్తం పండుగ వాతావరణాన్ని తలపించింది.
ఇటీవల జరిగిన ఎన్నికల్లో ప్రత్యర్థి అశోక్పై రికార్డు స్థాయి మెజార్టీతో విజయం సాధించిన మల్లాడి కృష్ణారావు, యానంలో మరోసారి తన ప్రభావాన్ని చాటుకున్నారు. ప్రజలే తన విజయానికి కారణమని ప్రకటించిన ఆయనకు ఇప్పుడు మంత్రి పదవి రావడంతో యానం ప్రజల్లో ఆనందానికి అవధులు లేకుండా పోయాయి. కేంద్రపాలిత ప్రాంత ప్రభుత్వంలో కీలక బాధ్యతలు చేపట్టిన మల్లాడి కృష్ణారావు యానంకు చేరుకోవడం స్థానికులకు ప్రత్యేక గర్వకారణంగా మారింది.
ప్రత్యేక హెలికాప్టర్లో యానంకు చేరుకున్న మల్లాడి కృష్ణారావుకు హెలిప్యాడ్ వద్ద అధికారులు, పార్టీ నాయకులు, అభిమానులు ఘన స్వాగతం పలికారు. పూల వర్షం కురిపిస్తూ, నినాదాలతో ఆయనకు స్వాగతం చెప్పారు. అనంతరం ఓపెన్ టాప్ వాహనంలో భారీ ఊరేగింపుగా నగరంలో ముందుకు సాగగా, రోడ్ల ఇరువైపులా నిల్చున్న ప్రజలు చేతులు ఊపుతూ అభినందనలు తెలిపారు.
ఈ సందర్భంగా మాట్లాడిన మంత్రి మల్లాడి కృష్ణారావు.. ఈ విజయం పూర్తిగా ప్రజలదే. వచ్చే ఐదేళ్లు ప్రజల కోసం పూర్తి స్థాయిలో పనిచేస్తాను. యానం అభివృద్ధి, ప్రజల సమస్యల పరిష్కారమే నా లక్ష్యం అని స్పష్టం చేశారు. యానంలో మౌలిక వసతులు, ఉపాధి అవకాశాలు, మత్స్యకారుల సంక్షేమం, రహదారుల అభివృద్ధిపై ప్రత్యేక దృష్టి పెడతానని హామీ ఇచ్చారు.
ఇక గోదావరిలో మత్స్యకారులు ఇచ్చిన స్వాగతం ప్రత్యేక ఆకర్షణగా నిలిచింది. వందలాది పడవలపై మల్లాడి జెండాలు ఎగురవేస్తూ, గోదావరి నిండా మత్స్యకారులు సందడి చేశారు. హెలికాప్టర్ దిగుతున్న సమయంలో బోట్లపై నుంచి జెండాలు ఊపుతూ, నినాదాలు చేస్తూ మల్లాడికి ప్రత్యేకంగా స్వాగతం పలికారు. ఈ దృశ్యాలు అక్కడికి వచ్చిన ప్రజలను విశేషంగా ఆకట్టుకున్నాయి.
యానంకు మంత్రి పదవి రావడం చారిత్రాత్మకమని స్థానికులు అభిప్రాయపడుతున్నారు. ఎన్నో ఏళ్లుగా పెండింగ్లో ఉన్న సమస్యలు ఇప్పుడు పరిష్కారమవుతాయనే ఆశాభావం వ్యక్తం చేస్తున్నారు. ముఖ్యంగా మత్స్యకారులు, యువత, వ్యాపార వర్గాలు ఈసారి యానం మరింత అభివృద్ధి చెందుతుందని నమ్మకం వ్యక్తం చేస్తున్నారు.
మొత్తానికి మంత్రి మల్లాడి కృష్ణారావు యానంకు చేరుకోవడంతో ఆ ప్రాంతం మొత్తం సంబరాల్లో మునిగిపోయింది. రాజకీయ నాయకుడిగా మాత్రమే కాకుండా ప్రజల మనిషిగా గుర్తింపు తెచ్చుకున్న మల్లాడికి లభించిన ఈ ఘన స్వాగతం యానంలో ఆయనకు ఉన్న ప్రజాదరణకు నిదర్శనంగా నిలిచింది.
Click here to add News18 as your preferred news source on Google. ఆంధ్రప్రదేశ్లోని ముఖ్యమైన వార్తలు, లేటెస్ట్ న్యూస్, స్థానిక వార్తలు, ప్రభుత్వ పథకాలు, ప్రభుత్వ ప్రకటనలు, అన్ని రాజకీయ పార్టీలకు సంబంధించిన స్టోరీలను న్యూస్18 తెలుగు ఆంధ్రప్రదేశ్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
East Godavari,Andhra Pradesh
