Tirumala festivals: మే నెలలో తిరుమల పర్వదినాల సందడి.. శ్రీవారి భక్తుల కోసం టీటీడీ విడుదల చేసిన ముఖ్యమైన తేదీలు ఇవే! |

మే నెలలో తిరుమల విశేష ఉత్సవాల క్యాలెండర్:

మే 1 కూర్మ జయంతి గరుడసేవ: మే నెల మొదటి రోజే శ్రీ కూర్మ జయంతి సందర్భంగా ఆలయంలో ప్రత్యేక పూజలు నిర్వహిస్తారు. అదే రోజు పౌర్ణమి కావడంతో, రాత్రి వేళ మలయప్ప స్వామి తన ఇష్ట వాహనమైన గరుడ వాహనంపై మాడ వీధుల్లో విహరిస్తూ భక్తులకు దర్శనమిస్తారు.

మే 2 అన్నమాచార్య జయంతి: పదకవితా పితామహుడు తాళ్లపాక అన్నమాచార్య జయంతిని పురస్కరించుకుని టీటీడీ అన్నమాచార్య కళామందిరం, నాదనీరాజనం వేదికలపై ప్రత్యేక సంకీర్తనార్చన కార్యక్రమాలను చేపడుతుంది.

మే 3 పరాశర భట్టర్ వర్ష తిరునక్షత్రం: శ్రీవైష్ణవ సంప్రదాయంలో గొప్ప పండితుడైన పరాశర భట్టర్ జయంతిని (తిరునక్షత్రం) పురస్కరించుకుని ఆలయ సంప్రదాయం ప్రకారం ఉత్సవం నిర్వహిస్తారు.

మే 12 హనుమజ్జయంతి: తిరుమలలో హనుమంతుని జన్మస్థలమైన ఆకాశగంగ అంజనాద్రి హనుమంతస్వామి ఆలయాల్లో విశేష అభిషేకాలు, పూజలు నిర్వహిస్తారు. శ్రీవారి ఆలయంలో సుందరకాండ పారాయణంతో పాటు ప్రత్యేక సేవలు ఉంటాయి.

మే 21 నమ్మాళ్వార్ ఉత్సవాల ప్రారంభం: పన్నెండు మంది ఆళ్వార్లలో ప్రధానమైన నమ్మాళ్వార్ ఉత్సవాలు ఈ రోజు ప్రారంభమవుతాయి. శ్రీవైష్ణవ సంప్రదాయంలో దీనికి అత్యంత ప్రాముఖ్యత ఉంది.

మే 26 వరదరాజస్వామి వర్ష తిరునక్షత్రం: శ్రీవారి ఆలయ ప్రాకారంలో ఉన్న వరదరాజస్వామి వారికి ఈ సందర్భంగా ప్రత్యేక అభిషేకాలు, పూజలు నిర్వహిస్తారు.

మే 30 నమ్మాళ్వార్ శాత్తుమొర: నమ్మాళ్వార్ ఉత్సవాలు ఈ రోజు జరిగే ‘శాత్తుమొర’ (ముగింపు వేడుక)తో సంపూర్ణమవుతాయి.

భక్తులకు టీటీడీ సూచనలు: మే నెలలో వరుసగా పర్వదినాలు రావడం, అలాగే వేసవి సెలవుల రద్దీ ఉండటంతో తిరుమలలో భక్తుల తాకిడి విపరీతంగా ఉండే అవకాశం ఉంది. ఈ నేపథ్యంలో భక్తులు తమ ప్రయాణాలను ముందుగానే ప్లాన్ చేసుకోవాలని టీటీడీ కోరుతోంది. పౌర్ణమి గరుడసేవ, హనుమజ్జయంతి వంటి కీలక రోజుల్లో రద్దీని దృష్టిలో ఉంచుకుని దర్శన సమయాల్లో మార్పులు ఉండే అవకాశం ఉంది.

రద్దీ ఎక్కువగా ఉండే రోజుల్లో వసతి గదుల లభ్యత తక్కువగా ఉంటుంది కాబట్టి, భక్తులు తగిన జాగ్రత్తలు తీసుకోవాలి. ఉత్సవాల సమయంలో ఆలయ మాడ వీధుల్లో జరిగే వాహన సేవలను వీక్షించి, స్వామివారి కృపకు పాత్రులు కావాలని అధికారులు సూచిస్తున్నారు.