Simhachalam Temple: సింహాద్రి అప్పన్న భక్తులకు శుభవార్త.. రేపటి నుంచే ‘చందన ప్రసాదం’ పంపిణీ! ధర ఎంతంటే.. | విశాఖపట్నం వార్తలు (Visakhapatnam News)

సింహాచల క్షేత్రంలో ఏటా నిర్వహించే అక్షయ తృతీయ చందనోత్సవం తర్వాత స్వామివారి శరీరం నుంచి తీసిన పవిత్ర చందనాన్ని ప్రసాదంగా భక్తులకు అందజేయడం ఆనవాయితీ. ఈ నేపథ్యంలో, 2026 ఏప్రిల్ 28వ తేదీ (మంగళవారం) ఉదయం 8:00 గంటల నుంచి దేవస్థానంలోని వివిధ ప్రసాద కౌంటర్ల ద్వారా ఈ చందన ప్రసాదాన్ని భక్తులకు విక్రయించనున్నట్లు ఆలయ కార్యనిర్వహణాధికారి (EO) జె. వెంకట్రావు ఒక ప్రకటనలో వెల్లడించారు.

భక్తులందరికీ ఈ పవిత్ర ప్రసాదం అందాలనే ఉద్దేశంతో దేవస్థానం కొన్ని కీలక నిబంధనలను విధించింది. ప్రతి చందన ప్రసాదం ప్యాకెట్ ధరను కేవలం రూ. 10 గా నిర్ణయించారు. సామాన్య భక్తులకు అందుబాటులో ఉండాలనే లక్ష్యంతో ఈ నామమాత్రపు ధరను ఖరారు చేశారు. ప్రసాదం పంపిణీలో పారదర్శకత కోసం దళారీ వ్యవస్థను అరికట్టడానికి, ప్రతి భక్తుడికి ఒక్క ప్యాకెట్ మాత్రమే అందజేస్తారు.

ప్రసాదం పొందాలనుకునే భక్తులు తప్పనిసరిగా తమ ఆధార్ కార్డు (ఒరిజినల్ లేదా ఫోటోకాపీ) వెంట తీసుకురావాలని అధికారులు స్పష్టం చేశారు. ఆధార్ నమోదు చేసుకున్న తర్వాతే ప్రసాదం పంపిణీ చేయడం జరుగుతుంది.

సింహాచలప్ప నిజరూప దర్శనం తర్వాత స్వామివారికి పూసిన చందనాన్ని మళ్ళీ ఏడాది పొడవునా భక్తులకు చిన్న చిన్న ప్యాకెట్ల రూపంలో అందజేస్తారు. ఈ చందనాన్ని భక్తులు ఎంతో పవిత్రంగా భావిస్తారు. దీన్ని నొసట ధరించడం వల్ల లేదా ఇంట్లో పూజా గదిలో ఉంచుకోవడం వల్ల శుభం జరుగుతుందని, స్వామివారి కృపాకటాక్షాలు లభిస్తాయని భక్తుల ప్రగాఢ విశ్వాసం. ముఖ్యంగా అక్షయ తృతీయ రోజున స్వామివారికి సమర్పించిన చందనం కాబట్టి దీనికి ఆధ్యాత్మిక ప్రాముఖ్యత చాలా ఎక్కువ.