Tirupati: తిరుపతి జిల్లాలో ఘోరం.. ఒకే కుటుంబంలో ఐదుగురు బలి.. నాన్న చనిపోవద్దు అని వేడుకున్న పిల్లలు.. మిస్టరీగా మారిన మరణాలు | ఆంధ్రప్రదేశ్ వార్తలు

ఈనాడు కథనం ప్రకారం.. నారాయణవనం మండలం వెంకటకృష్ణపాలెంకు చెందిన మోహన్ స్థానికంగా సిమెంట్ దుకాణం నడుపుతూ జీవనం సాగిస్తున్నాడు. అతడి భార్య హరిత (33) టైలరింగ్ షాప్ నడుపుతోంది. వీరికి కౌశిక్ (14), హరిణి (12) అనే ఇద్దరు పిల్లలు ఉన్నారు. మోహన్ తల్లి చంద్రకళ (65) కూడా వారితోనే ఉంటోంది.

మధ్యాహ్నం నుండి మోహన్ ఫోన్ స్విచాఫ్ రావడంతో అతడి బావ బాలకృష్ణ అనుమానంతో ఇంటికి వెళ్లి చూడగా, హరిత, చంద్రకళ విగతజీవులుగా పడి ఉన్నారు. వెంటనే పోలీసులకు సమాచారం అందించగా, వారు మోహన్ కోసం గాలింపు చేపట్టారు. రాత్రి 7:15 గంటల సమయంలో పుత్తూరు మండలం వేపగుంట రైల్వే స్టేషన్ సమీపంలో మోహన్ తన వాహనాన్ని ఆపి, పిల్లలతో కలిసి పట్టాల వద్దకు వెళ్లాడు.

ఈ సామూహిక మరణాలకు గల కారణం ఇప్పటికీ అంతుచిక్కడం లేదు. స్థానికుల కథనం ప్రకారం.. మోహన్‌కు ఎలాంటి ఆర్థిక ఇబ్బందులు లేవు. కుటుంబంలో కూడా పెద్దగా గొడవలు జరిగిన దాఖలాలు లేవు. బుధవారం ఉదయమే తన సోదరి అప్పుల కోసం కొంత నగదును తెలిసిన వ్యక్తికి ఇచ్చాడని సమాచారం. అంతా సవ్యంగా ఉందనుకుంటున్న సమయంలో, మోహన్ ఇంతటి కఠిన నిర్ణయం ఎందుకు తీసుకున్నాడు? తన కన్నతల్లిని, భార్యను ఎందుకు చంపాడు? అనేది పోలీసులకు పెద్ద మిస్టరీగా మారింది.

తిరుపతి జిల్లా పోలీసులు ఈ ఘటనపై కేసు నమోదు చేసి దర్యాప్తు వేగవంతం చేశారు. మోహన్ మానసిక స్థితి సరిగ్గా లేకపోవడమా లేక ఎవరికైనా తెలియని రహస్య సమస్యలు ఏవైనా ఉన్నాయా అనే కోణంలో విచారణ జరుపుతున్నారు. ఒకే రోజులో ఒకే కుటుంబానికి చెందిన ఐదుగురు చనిపోవడంతో నారాయణవనం గ్రామంలో విషాద ఛాయలు అలుముకున్నాయి.