Tirumala: తిరుమలలో శ్రీవేంకటేశ్వర మ్యూజియం రెడీ.. కొండపై మరో విజిటింగ్ స్పాట్ |

నిర్మాణ పనులు నిర్దిష్ట గడువులో పూర్తి కావడానికి సమగ్ర ప్రణాళికతో ముందుకు సాగుతున్నామని ఆయన పేర్కొన్నారు.సుమారు 1.25 లక్షల చదరపు అడుగుల విస్తీర్ణంలో విస్తరించిన ఈ మ్యూజియంలో ఇప్పటికే దాదాపు లక్ష చదరపు అడుగుల మేర ఆధునీకరణ పనులు పూర్తయ్యాయి. మొత్తం 14 గ్యాలరీలను అత్యాధునిక సాంకేతికతతో తీర్చిదిద్దుతూ, భక్తులకు ఆధ్యాత్మికతతో కూడిన విశిష్ట అనుభూతి కలిగేలా రూపకల్పన చేస్తున్నట్లు అదనపు ఈవో తెలిపారు. తిరుమల క్షేత్ర వైభవం, ఆలయ చారిత్రక నేపథ్యం, శాసనాలు, అన్నమాచార్య వైభవం, అలాగే పల్లవులు, చోళులు, విజయనగర రాజులు వంటి రాజవంశాల శ్రీవారితో ఉన్న అనుబంధాన్ని ప్రతిబింబించేలా గ్యాలరీలను రూపొందిస్తున్నట్లు వివరించారు.

భక్తులకు మరింత మెరుగైన సేవలందించేందుకు మ్యూజియాన్ని ప్రొఫెషనల్ ఏజెన్సీ ద్వారా దీర్ఘకాలిక సుస్థిరతతో నిర్వహించే అంశంపైనా చర్చించినట్లు ఆయన చెప్పారు. మ్యూజియంలో ప్రవేశ, నిష్క్రమణ సదుపాయాలతో పాటు క్యాఫెటీరియా, సావనీర్ షాప్ వంటి ఆధునిక సౌకర్యాలను ఏర్పాటు చేయనున్నట్లు తెలిపారు. భక్తులు తిరుమలకు వచ్చినప్పుడు కేవలం దర్శనం మాత్రమే కాకుండా, శ్రీవారి ఆలయ చారిత్రక వైభవాన్ని కూడా అనుభవించేలా ఈ మ్యూజియాన్ని అత్యున్నత ప్రమాణాలతో అభివృద్ధి చేస్తున్నామని పేర్కొన్నారు. ఈ పరిశీలన కార్యక్రమంలో చీఫ్ మ్యూజియం ఆఫీసర్ (ఎఫ్ఏసీ) శ్రీ సోమన్నారాయణ, ఇతర అధికారులు, టీసీఎస్ ప్రతినిధులు పాల్గొన్నారు.