ఉమ్మడి చిత్తూరు జిల్లాలో ఎన్నో పోరాటాలు
*వర్గ దృక్పథంతో ఉద్యమాలు
*రేపటి నుంచి తిరుపతిలో 18వ రాష్ట్ర మహాసభలు
(విశాలాంధ్ర-తిరుపతి)చరిత్ర అంటే కేవలం రాజుల విజయగాథలు మాత్రమే కాదు… చెమట చిందించి సమాజ చక్రాన్ని నడిపే శ్రామికుడి పోరాట పటిమ కూడా. ఉమ్మడి చిత్తూరు జిల్లా సామాజిక, రాజకీయ పరిణామ క్రమంలో ఏఐటీయూసీ నిర్వహించిన పాత్ర అద్వితీయం. దశాబ్దాల కాలంగా ఈ జిల్లాలో ఎర్రజెండా నీడన సాగిన కార్మికోద్యమాలు కేవలం ఆర్థిక ప్రయోజనాల కోసమే కాకుండా, ఆత్మగౌరవం, సామాజిక న్యాయం, ప్రజాస్వామ్య పరిరక్షణ కోసం ధిక్కార స్వరాన్ని వినిపించాయి. శ్రమను దోపిడీ చేసే శక్తులపై వర్గ దృక్పథంతో సాగిన ఈ యుద్ధం… ఈనెల 26వ తేదీ నుంచి తిరుపతిలో జరగనున్న 18వ రాష్ట్ర మహాసభల వేళ సరికొత్త ఉత్తేజాన్ని సంతరించుకుంది.
చారిత్రక ఉద్యమ ప్రస్థానం
ఉమ్మడి చిత్తూరు జిల్లాలో కార్మికోద్యమ విస్తరణ 1980వ దశకంలో ఒక కొత్త మలుపు తిరిగింది. వరదయ్యపాళెం చేనేత కార్మికులు, అవంతి లెదర్స్, నగరిలోని టెక్స్ టైల్స్ రంగాల్లో యూనియన్ల నిర్మాణం ద్వారా శ్రమజీవులను ఏకం చేయడం జరిగింది. అప్పట్లో యజమానుల బెదిరింపులకు లొంగకుండా, తీవ్రమైన కష్టనష్టాలను ఓర్చి కార్మిక ప్రజల హృదయాల్లో ఉద్యమ స్ఫూర్తిని నింపారు. ముఖ్యంగా చిత్తూరు పట్టణంలో నామమాత్రంగా ఉన్న ఉనికిని, ట్రేడ్ యూనియన్ల ద్వారా బలోపేతం చేసి, ప్రతి వాడలోనూ చైతన్యాన్ని రగిలించారు. 1989లో చిత్తూరులో జరిగిన 13వ మహాసభలు జిల్లా వ్యాప్తంగా కార్మిక శ్రేణులను ఏకోన్ముఖం చేశాయి. పట్టణాల్లో కేవలం కార్మికులకే పరిమితం కాకుండా, ప్రభుత్వ ఉద్యోగులను కూడా సమన్వయం చేసి ‘టౌన్ ట్రేడ్ యూనియన్ కౌన్సిల్’ ఏర్పాటు చేయడం ఒక చారిత్రక అవసరం. దీని ఫలితంగానే టాక్సీ డ్రైవర్లు, పవర్ మిల్లు వర్కర్లు, సినీ కార్మిక సంఘం వంటి అనేక కొత్త విభాగాలు ఏఐటీయూసీ గొడుగు కిందకు వచ్చాయి. అప్పట్లో గూండాయిజానికి వ్యతిరేకంగా మహిళా సమాఖ్య ఆధ్వర్యంలో నిర్వహించిన పోరాటాలు సామాన్యులకు కొండంత అండగా నిలిచాయి. చిత్తూరు పట్టణాభివృద్ధి కోసం 25 డిమాండ్లతో పోరాడి, ఎస్.టి.ఆర్. జలాశయం, ఆర్.టి.సి. బస్టాండు, పేదలకు ఇళ్ల స్థలాలు సాధించడం ద్వారా ఏఐటీయూసీ ప్రజా పక్షపాతిగా నిరూపించుకుంది.
అసంఘటిత రంగం గొంతుక
సమాజంలో అత్యంత అట్టడుగున ఉండి, చట్టబద్ధమైన భద్రత లేని అసంఘటిత రంగ కార్మికుల జీవితాల్లో ఏఐటీయూసీ వెలుగులు నింపింది.
*పారిశుధ్య కార్మికులు…: గ్రామ పంచాయతీల్లో పనిచేసే పారిశుద్ధ్య కార్మికులను ఏకం చేసి ‘గ్రీన్ అంబాసిడర్స్ అసోసియేషన్’ను స్థాపించడం జరిగింది. వారి సమస్యలపై సాగిన రాజీలేని పోరాటం వల్ల రూ.6,000 ఉన్న వేతనం రూ.10,000కు పెరిగింది. ఇది కేవలం వేతన పెంపు మాత్రమే కాదు, వారి శ్రమకు దక్కిన గుర్తింపు.
*అంగన్వాడీ, ఆశా వర్కర్లు….: జిల్లా వ్యాప్తంగా అంగన్వాడీ వర్కర్లను సమీకరించి కనీస వేతనాల కోసం, ఉద్యోగ భద్రత కోసం నిర్వహించిన ఆందోళనలు అమోఘం. ఆరోగ్య రంగంలో కీలకమైన ఆశా వర్కర్ల సమస్యలపై రాష్ట్ర స్థాయి ఉద్యమాల్లో జిల్లా కార్మికులు పెద్ద ఎత్తున పాల్గొని విజయాలు సాధించారు.
*ఆయమ్మలు, మధ్యాహ్న భోజన పథకం…: ప్రభుత్వ పాఠశాలల్లో పనిచేసే ఆయమ్మలకు గతంలో కేవలం రూ.2,000 జీతం ఉండేది. ఏఐటీయూసీ పట్టుదలతో సాగించిన పోరాటం ఫలితంగా నేడు అది రూ.6,000కు చేరింది. అలాగే స్కూల్ స్వీపర్లు, మిడ్ డే మీల్స్ వర్కర్లకు గుర్తింపు కార్డుల సాధనలో ఈ సంస్థ అగ్రభాగాన నిలిచింది.
*హమాలీ, భవన నిర్మాణ రంగం…: సివిల్ సప్లైస్, ఐ.ఎం.ఎల్ డిపోలలో పనిచేసే హమాలీలకు ఏటా రేటు కార్డు పెంచేలా యాజమాన్యాలపై ఒత్తిడి తెచ్చింది. తిరుపతిలో వేలాది మంది భవన నిర్మాణ కార్మికులకు సంక్షేమ పథకాలు, ప్రమాద బీమా అమలు చేయాలని సాగించిన పోరాటాలు ఎందరో కార్మికుల కుటుంబాల్లో భరోసా నింపాయి.
భూపోరాటాలు… సామాజిక న్యాయం
ఏఐటీయూసీ చరిత్ర కేవలం ఫ్యాక్టరీ గేట్లకే పరిమితం కాలేదు. అణగారిన వర్గాల భూహక్కుల కోసం జిల్లా నలుమూలల రక్తం చిందించింది. అరగొండ సమీపంలోని మాధవరంలో 42 ఎకరాల భూమిని పేదలకు పంచడం, గిరిజనుల ఇళ్లను కూల్చివేసిన భూస్వాములపై చట్టపరమైన పోరాటం చేయడం వంటివి శ్రామిక శక్తికి నిదర్శనం. కె.వి.బి. పురం మండలంలో వెట్టిచాకిరిలో ఉన్న పేద కూలీలను విముక్తి చేయడం కోసం పోలీసులతోనే తలపడిన చరిత్ర ఏఐటీయూసీ సొంతం. అధికార పార్టీల ఒత్తిళ్లకు లొంగకుండా, నిజాయితీగా పనిచేసే కలెక్టర్లు, జాయింట్ కలెక్టర్ల అక్రమ బదిలీలకు వ్యతిరేకంగా సాగించిన పోరాటం జిల్లాలో నైతిక విలువల పరిరక్షణకు సంకేతం. చిత్తూరులో మైనర్ బాలికలపై జరిగిన అత్యాచార సంఘటనల్లో ప్రజలందరినీ సమీకరించి, నిందితులను అరెస్టు చేసే వరకు నిద్రపోని ఉద్యమ పటిమ సామాజిక బాధ్యతకు చిహ్నం.
సంఘటిత రంగం… పరిశ్రమల రక్షణ
మెడికల్, బ్యాంక్, పోస్టల్, ఆర్టీసీ రంగాల్లో ఉద్యోగుల హక్కుల కోసం అనేక ధర్నాలు, సమ్మెలు నిర్వహించబడ్డాయి. తిరుపతిలోని వివిధ యూనివర్సిటీల్లో పనిచేస్తున్న ఎన్.ఎం.ఆర్ ఉద్యోగుల ఉద్యోగ భద్రత, టైం స్కేల్ సాధన కోసం నేటికీ పోరాటాలు సాగుతున్నాయి. ఒకప్పుడు జిల్లాలో వెలుగొందిన ఎస్వీ కాటన్ మిల్లు, గమతి స్పిన్నింగ్ మిల్లు వంటి పరిశ్రమల్లో కార్మికులకు అండగా నిలబడింది ఏఐటీయూసీయే. ఆర్థిక సరళీకరణ విధానాల వల్ల మిల్లులు మూతపడినా, ఆనాడు కార్మికులు సాధించిన ప్రయోజనాలు ఉద్యమ చరిత్రలో చిరస్థాయిగా నిలిచిపోయాయి. తిరుమల కొండపై రౌడీయిజానికి వ్యతిరేకంగా, హాకర్ల సమస్యల పరిష్కారం కోసం సాగిన పోరాటాలు, ఆమరణ నిరాహార దీక్షలు యాత్రికులను, స్థానికులను ఎంతగానో ప్రభావితం చేశాయి. రాజకీయ కార్యకలాపాల నిషేధాన్ని ఎదిరించి నిలిచిన ఏకైక శక్తిగా ఏఐటీయూసీ చరిత్ర సృష్టించింది.
మహాసభల వేళ సరికొత్త సమరశంఖం
1979లో తిరుపతిలో జరిగిన ప్రథమ మహాసభ నుంచి నేడు జరగబోయే 18వ రాష్ట్ర మహాసభల వరకు ఏఐటీయూసీ ప్రస్థానం ఒక నిప్పుకణంలా సాగుతోంది. 1988, 2014లో తిరుపతి వేదికగా జరిగిన మహాసభలు కార్మిక లోకానికి కొత్త దిశానిర్దేశం చేశాయి. ప్రస్తుతం ఈనెల 26వ తేదీ నుంచి మూడు రోజుల పాటు జరగనున్న మహాసభలు కేవలం ఉత్సవాలు కావు… ఇవి మారుతున్న కాలానికి అనుగుణంగా కార్మిక హక్కుల పరిరక్షణకు సిద్ధమయ్యే సమరశంఖాలు. నాడు 1981 సార్వత్రిక సమ్మెలో అరెస్టులకు భయపడకుండా ముందుకు సాగిన స్ఫూర్తి, నేటి యువ కార్మికుల్లో ఇంధనం నింపాలి. జిల్లా వ్యాప్త టెక్స్ టైల్ ఫెడరేషన్ నుంచి గ్రానైట్ వర్కర్ల యూనియన్ వరకు ఏఐటీయూసీ సాధించిన ప్రతి విజయం, చిందించిన ప్రతి రక్తపు చుక్క కార్మిక వర్గ చరిత్రకు సాక్ష్యంగా నిలుస్తుంది. రేపటి మహాసభలు మరింత బలమైన ఉద్యమాలకు పునాది కావాలని, శ్రమజీవుల రాజ్య స్థాపనకు బాటలు వేయాలని ఆశిస్తూ… కార్మిక లోకం గర్వంగా గర్జిస్తోంది.
