సముద్రం నుంచి శివలింగం ప్రత్యక్షం.. ఆ జిల్లాలో భక్తులను ఆశ్చర్యపరిచిన ఘటన..! shivlinga appears from sea at thupilipalem beach. |

శివలింగం కనిపించగానే అక్కడున్న భక్తులు దానిని ఒడ్డుకు తీసుకురావడానికి ప్రయత్నించారు. అలలతో పోరాడుతూ ఎంతో కష్టపడి చివరకు లింగాన్ని భద్రంగా ఒడ్డుకు చేర్చారు. అనంతరం భక్తులు స్వామివారిని దర్శించుకుని పూజలు నిర్వహించారు. దగ్గరగా చూసిన వారు ఇది తమ జీవితంలో అరుదైన అనుభవమని ఆనందం వ్యక్తం చేశారు. కొందరు ఈ దృశ్యాలను తమ మొబైల్ ఫోన్లలో చిత్రీకరించి సోషల్ మీడియాలో పంచుకోవడంతో ఈ ఘటన వేగంగా వైరల్ అవుతోంది.

ఈ ఘటనతో పాటు నంది, నాగ పడగల ఆకారంలో మరికొన్ని విగ్రహాలు కూడా సముద్రం నుంచి బయటకు వచ్చినట్లు సమాచారం రావడం మరింత ఆసక్తిని రేకెత్తిస్తోంది. దీంతో ఈ ప్రాంతానికి మరింత ప్రాధాన్యం ఏర్పడి, పరిసర గ్రామాల ప్రజలు పెద్ద సంఖ్యలో బీచ్‌కు చేరుకుని దర్శనం చేసుకుంటున్నారు.

ప్రస్తుతం ఈ సంఘటన స్థానికంగా చర్చనీయాంశంగా మారింది. సముద్ర అలల్లో ఇలా విగ్రహాలు కనిపించడం దైవ చింతనగా భావిస్తున్న భక్తులు, ఇది శుభసూచకమని అభిప్రాయపడుతున్నారు. మరోవైపు ఈ ఘటనకు సంబంధించిన మరిన్ని వివరాలు తెలియాల్సి ఉండగా, బీచ్ పరిసర ప్రాంతాల్లో భక్తుల రద్దీ నెలకొంది. పలువురు పూజా కార్యక్రమాలు చేస్తున్నారు.