విశాలాంధ్ర -నార్పల :- మండల పరిధిలోని గూగూడు గ్రామంలోని గూగుడు ఉత్సవాలు మూడు రోజులు పూర్తయినప్పటికీ, ఉత్సవాలకు ముందు పూర్తి చేయాల్సిన పలు అభివృద్ధి పనులు ఇప్పటికీ అసంపూర్తిగానే ఉండిపోవడం అధికార యంత్రాంగం పనితీరుపై ప్రశ్నలు లేవనెత్తుతోంది. భక్తుల సౌకర్యాలు, భద్రతకు సంబంధించిన సమస్యలు అలాగే కొనసాగుతున్నప్పటికీ అధికారులు స్పందించకపోవడంపై గ్రామస్తులు తీవ్ర ఆగ్రహం వ్యక్తం చేస్తున్నారు.గ్రామంలో డ్రైనేజ్ పనులు ఇంకా పూర్తి కాకపోవడంతో పాటు ప్రధాన రహదారులు గుంతలమయంగా మారాయి. పలు చోట్ల నీరు నిలిచిపోవడంతో భక్తులు, వాహనదారులు తీవ్ర ఇబ్బందులు ఎదుర్కొంటున్నారు. గుంతలను పూడ్చేందుకు కనీసం మట్టి వేయడం వంటి తాత్కాలిక చర్యలు కూడా చేపట్టకపోవడంపై గ్రామస్తులు మండిపడుతున్నారు. ఉత్సవాలకు భారీ సంఖ్యలో భక్తులు తరలివస్తున్నప్పటికీ రోడ్ల మరమ్మతులపై సంబంధిత అధికారులు దృష్టి సారించకపోవడం విమర్శలకు దారితీస్తోంది.అదేవిధంగా రోడ్డు పక్కన వాహనాల రాకపోకలకు అడ్డంగా, ప్రమాదకరంగా ఉన్న కంపాలా చెట్టును తొలగించడంలో కూడా అధికారులు పూర్తిగా విఫలమయ్యారని స్థానికులు ఆరోపిస్తున్నారు. వేలాది మంది భక్తులు, వాహనాలు రాకపోకలు సాగిస్తున్నప్పటికీ ప్రమాదాలను నివారించేందుకు ఎలాంటి ముందస్తు చర్యలు తీసుకోకపోవడం ఆందోళన కలిగిస్తోంది.స్థానిక ఎమ్మెల్యే బండారు శ్రావణి ఉత్సవాలకు వచ్చే భక్తులకు ఎలాంటి ఇబ్బందులు కలగకుండా మిగిలి ఉన్న పనులను వెంటనే పూర్తి చేయాలని అధికారులకు స్పష్టమైన ఆదేశాలు జారీ చేసినప్పటికీ, వాటి అమలులో ఎలాంటి పురోగతి కనిపించడం లేదని భక్తులు పేర్కొంటున్నారు. ప్రజాప్రతినిధుల ఆదేశాలను సైతం అధికారులు బేఖాతరు చేస్తున్నారనే విమర్శలు వినిపిస్తున్నాయి.మార్గమధ్యంలోని విద్యుత్ స్తంభాల వద్ద వీధి దీపాల ఏర్పాటు విషయంలో కూడా అధికారుల నిర్లక్ష్యం స్పష్టంగా కనిపిస్తోందని భక్తులు ఆవేదన వ్యక్తం చేస్తున్నారు. ప్రతి ఏడాది వీధి దీపాల కొరత కారణంగా ప్రమాదాలు చోటుచేసుకుంటున్నప్పటికీ, ఈసారి కూడా అదే పరిస్థితి కొనసాగుతోందని చెబుతున్నారు. రాత్రి వేళల్లో భక్తులు, వాహనదారులు ఇబ్బందులు ఎదుర్కొంటున్నప్పటికీ సమస్య పరిష్కారానికి చర్యలు కనిపించడం లేదని అంటున్నారు.
రోజురోజుకూ అభివృద్ధి చెందుతున్న గూగుడు గ్రామానికి కనీస మౌలిక సదుపాయాలు కల్పించడంలో అధికారులు పూర్తిగా విఫలమవుతున్నారని భక్తులు ఆగ్రహం వ్యక్తం చేస్తున్నారు. ఉత్సవాలు జరుగుతున్న సమయంలో కూడా డ్రైనేజ్, రోడ్లు, వీధి దీపాలు, భద్రతా చర్యల వంటి సమస్యలు అలాగే ఉండటం అధికారుల నిర్లక్ష్యానికి నిదర్శనంగా మారిందని విమర్శిస్తున్నారు.ఇప్పటికైనా అధికారులు క్షేత్రస్థాయిలో పర్యటించి అసంపూర్తిగా ఉన్న పనులను వెంటనే పూర్తి చేయడంతో పాటు రోడ్ల మరమ్మతులు చేపట్టి, నిల్వ నీటి సమస్యను పరిష్కరించి, వీధి దీపాల ఏర్పాటు పూర్తి చేసి, ఉత్సవాల మిగిలిన రోజుల్లో భక్తులకు ఎలాంటి ఇబ్బందులు కలగకుండా చర్యలు తీసుకోవాలని గ్రామ ప్రజలు గట్టిగా డిమాండ్ చేస్తున్నారు.
