Prakasam: యర్రగొండపాలెంలో విషాదం..నీటికుంటలో పడి ఇద్దరు విద్యార్థుల మృతి.. రోడ్డుపై మృతదేహాలతో బంధువుల రాస్తారోకో! | ఆంధ్రప్రదేశ్ వార్తలు

ఈనాడు కథనం ప్రకారం.. పెదబోయలపల్లి ఎస్సీ కాలనీకి చెందిన బోయలపల్లి దీపన్ (10), కొమ్ము శశికుమార్ (12) ప్రాణ స్నేహితులు. దీపన్ యర్రగొండపాలెంలో మూడో తరగతి చదువుతుండగా, శశికుమార్ స్థానిక ప్రభుత్వ పాఠశాలలో ఐదో తరగతి చదువుతున్నాడు. మంగళవారం పాఠశాలలకు సెలవు కావడంతో, ఈ ఇద్దరు మరో ఇద్దరు స్నేహితులు బంటి, రోహన్‌లతో కలిసి గ్రామ సమీపంలోని అడవి తోటకు వెళ్లారు.

విషయం తెలుసుకున్న గ్రామస్తులు, యువకులు కుంట వద్దకు చేరుకుని గాలించినా ఫలితం లేకపోయింది. సమాచారం అందుకున్న యర్రగొండపాలెం సీఐ అజయ్‌కుమార్ వెంటనే ఘటనా స్థలానికి చేరుకున్నారు. ఏమాత్రం ఆలస్యం చేయకుండా ఆయనే స్వయంగా నీటికుంటలోకి దిగి బాలుర కోసం వెతికారు. తాడు సాయంతో ఇద్దరు బాలురను బయటకు తీశారు. శశికుమార్ శరీరంలో ఇంకా నాడి కొట్టుకుంటుందని గమనించిన పోలీసులు, వెంటనే వారిని ప్రభుత్వ ఆసుపత్రికి తరలించారు. అయితే, అప్పటికే వారు మృతి చెందినట్లు వైద్యులు ధృవీకరించారు.

దీపన్ తన తల్లిదండ్రులైన మరియదాస్, ఎస్తేరులకు ఉన్న ఇద్దరు సంతానంలో ఏకైక కుమారుడు. అల్లారుముద్దుగా పెంచుకుంటున్న కొడుకు కళ్లముందే శవమై పడి ఉండటంతో ఆ తల్లిదండ్రులు కుప్పకూలిపోయారు. శశికుమార్ తల్లిదండ్రులు కొండయ్య, కుమారిల పరిస్థితి కూడా వర్ణనాతీతంగా మారింది. గ్రామంలోని ఎస్సీ కాలనీ అంతా శోకసంద్రంలో మునిగిపోయింది.

ఈ ప్రమాదానికి కారణమైన నీటికుంటను వెంటనే పూడ్చివేయాలని, అలాగే ఆక్రమణకు గురైన స్థానిక శ్మశాన స్థలాన్ని తిరిగి అప్పగించాలని డిమాండ్ చేస్తూ బాధితుల బంధువులు ఆగ్రహం వ్యక్తం చేశారు. మంగళవారం సాయంత్రం విద్యార్థుల మృతదేహాలతో జాతీయ రహదారిపై బైఠాయించి రాస్తారోకో నిర్వహించారు. సుమారు రెండు గంటల పాటు ట్రాఫిక్ నిలిచిపోయింది. చివరకు సీఐ అజయ్‌కుమార్, ఎస్సై దేవకుమార్‌లు జోక్యం చేసుకుని, ఆక్రమణలను తొలగిస్తామని, కుంటను పూడ్చివేస్తామని హామీ ఇవ్వడంతో గ్రామస్తులు ఆందోళన విరమించారు.