Flexi Controversy: కూటమి కలహాలు.. ఫ్లెక్సీపై సీఎం ఫొటో మిస్సింగ్.. టీడీపీ-జనసేన మధ్య తోపులాట..! flexi dispute in pithapuram tension between tdp. | ఈస్ట్ గోదావరి వార్తలు (East Godavari News)

మంగళవారం పిఠాపురంలో నిర్వహించిన ప్రధానమంత్రి జన్ ఆరోగ్య యోజన (PMJAY) కార్యక్రమం సందర్భంగా ఈ ఘటన జరిగింది. కార్యక్రమానికి ఏర్పాటు చేసిన ఫ్లెక్సీలో సీఎం ఫొటో కనిపించకపోవడాన్ని టీడీపీ రాష్ట్ర ఉపాధ్యక్షుడు ఎస్వీఎస్ఎన్ వర్మ గుర్తించి తీవ్ర అభ్యంతరం వ్యక్తం చేశారు. ప్రభుత్వ అధికారిక కార్యక్రమంలో సీఎం ఫొటో లేకపోవడం ప్రోటోకాల్ ఉల్లంఘన అని ఆయన జనసేన నాయకులు, అధికారులను నిలదీశారు. ఈ వ్యాఖ్యలతో అక్కడి వాతావరణం ఒక్కసారిగా వేడెక్కింది.

ఈ క్రమంలో జనసేన జిల్లా అధ్యక్షుడు తుమ్మలబాబుతో వర్మకు వాగ్వాదం చోటుచేసుకుంది. ఇంతలో మాజీ ఎమ్మెల్యే పెండెం దొరబాబు కల్పించుకుని వర్మపైకి దూసుకెళ్లడంతో పరిస్థితి ఉద్రిక్తంగా మారింది. ఇరువర్గాల కార్యకర్తలు ఒకరినొకరు నెట్టుకోవడంతో అక్కడ గందరగోళం నెలకొంది. పరిస్థితి అదుపు తప్పేలా మారుతుండటంతో వెంటనే పోలీసులు రంగప్రవేశం చేసి ఇరువర్గాలను శాంతింపజేశారు.

అనంతరం వర్మ తీవ్రంగా స్పందిస్తూ దొరబాబు తీరుపై ఆగ్రహం వ్యక్తం చేశారు. “జనసేన, టీడీపీ ఒకే కుటుంబం. కానీ వైసీపీ నుంచి వచ్చిన వారు ఇక్కడ పెత్తనం చెలాయిస్తే ఎలా? క్రమశిక్షణ తప్పితే తోలు తీస్తా” అంటూ ఘాటుగా హెచ్చరించారు. పవన్ కల్యాణ్ గెలుపు కోసం తామంతా కష్టపడితే, గెలిపించిన టీడీపీ నాయకులపైనే దాడులు చేయడం సమంజసం కాదని ప్రశ్నించారు. ముఖ్యమంత్రికి అవమానం జరిగితే సహించబోమని ఆయన స్పష్టం చేశారు.

ఈ ఘటనతో పిఠాపురంలో కూటమి పార్టీల మధ్య సమన్వయ లోపం మరోసారి బయటపడింది. ఒక చిన్న ఫ్లెక్సీ వివాదం ఎలా పెద్ద రాజకీయ ఘర్షణగా మారుతుందో ఈ ఘటన స్పష్టంగా చూపించింది. ప్రస్తుతం ఈ సంఘటన రాజకీయ వర్గాల్లోనే కాకుండా సోషల్ మీడియాలో కూడా హాట్ టాపిక్‌గా మారింది.