TTD Parakamani Case: ‘వైసీపీ నేతలను నిందితులుగా చేర్చేందుకు అతడికి బాధ్యతలు’.. పరకామణి చోరీ కేసుపై భూమన సంచలన వ్యాఖ్యలు | ఆంధ్రప్రదేశ్ వార్తలు

పరకామణి కేసులో ఇప్పటికే ఇద్దరు డీజీ స్థాయి అధికారులు విచారణ పూర్తి చేసి కోర్టుకు నివేదిక సమర్పించిన తర్వాత మరోసారి విచారణ పేరుతో డీఎస్పీ స్థాయి అధికారిని నియమించడం అనుమానాస్పదందా ఉందని టీటీడీ మాజీ ఛైర్మన్ భూమన ఆరోపణలు చేశారు. తమకు అనుకూలంగా నివేదిక సిద్ధం చేయించేందుకు ప్రయత్నాలు జరుగుతున్నాయనే సందేహాన్ని ఆయన వ్యక్తం చేశారు. వైసీపీ నాయకులనే లక్ష్యంగా చేసుకుని ఈ చర్యలు తీసుకుంటున్నారని ఆయన విమర్శలు చేశారు.

అలాగే తిరుమ లడ్డూ నెయ్యి కల్తీ అంశంలో ఏకసభ్య కమిషన్ ఏర్పాటు చేయడం చట్టబట్టతపై కూడా భూమన కరుణాకర్ రెడ్డి ప్రశ్నలు లేవనెత్తారు. ఇది సుప్రీంకోర్టు ఆదేశాలకు విరుద్ధమని కోర్టు నిర్ణయాలను పక్కన పెట్టే చర్యగా భావించాల్సి వస్తుందని అన్నారు. సిట్ దర్యాప్తు కొనసాగుతున్న సమయంలో మరో కమిషన్ ఏర్పాటు చేయడం సరైంది కాదని వ్యాఖ్యానించారు. ఈ నిర్ణయంపై సుప్రీంకోర్టు తీవ్రంగా స్పందించే అవకాశం ఉందని ఆయన అభిప్రాయపడ్డారు. ముఖ్యమంత్రి తీసుకున్న చర్యలు చట్టపరమైన సవాళ్లను ఎదుర్కొనే పరిస్థితి తలెత్తుతుందని తెలిపారు.

సాక్ష్యాలు సమర్పించలేకపోతే కేసు ఎందుకు కొనసాగించాలన్న విషయంపై వివరణ ఇవ్వాలని పేర్కొంటూ, ఏసీబీ అధికారులు హైదరాబాద్‌లోని ఆయన నివాసానికి నోటీసులు పంపించారు. ఈ నెల 27న విజయవాడలోని ఏసీబీ కోర్టుకు హాజరు కావాలని ఆదేశించారు. ఈ క్రమంలో ఫిర్యాదుదారు బలమైన ఆధారాలు చూపించకపోతే కేసు బలహీనమయ్యే అవకాశముంది.