హెరిటేజ్‌ ఫుడ్స్‌తో ఇందాపూర్ డైరీకి ఉన్న లింక్ ఏంటి?.. కల్తీ నెయ్యికి హెరిటేజ్ సంస్థకు సంబంధం ఉందా? | ఆంధ్రప్రదేశ్ వార్తలు

ఇరు సంస్థల వ్యాపార విధానాలూ భిన్నమని కూడా మంత్రి వెల్లడించారు. ఇందాపూర్ డెయిరీ ప్రధానంగా బల్క్ మార్కెటింగ్‌లో పనిచేస్తుండగా, వినియోగదారుల మార్కెట్‌కు సరఫరా చేసే చిన్న కంపెనీలు అక్కడి నుంచి ఉత్పత్తులు కొనుగోలు చేస్తాయని చెప్పారు. హెరిటేజ్ కొన్ని ఉత్పత్తులను ఇందాపూర్ నుంచి కొనుగోలు చేసినప్పటికీ, నెయ్యి సరఫరాలో మాత్రం అలాంటి సంబంధం లేదని స్పష్టం చేశారు. హెరిటేజ్‌కు స్వంత నెయ్యి తయారీ యూనిట్ ఉండటంతో, అది వినియోగదారుల మార్కెట్‌పైనే దృష్టి పెడుతుందని, బల్క్ ట్యాంకర్ల ద్వారా నెయ్యి రవాణా చేసిన దాఖలాలు లేవని తెలిపారు.

ఇక ఈ అంశంపై రాజకీయ వర్గాల్లో కూడా మాటల యుద్ధం కొనసాగుతోంది. వైఎస్ జగన్ మోహన్ రెడ్డి నేతృత్వంలోని వైఎస్సార్ కాంగ్రెస్ పార్టీ ఈ వ్యవహారంపై అనుమానాలు వ్యక్తం చేస్తోంది. గతంలో తక్కువ ధరకు విక్రయించిన నెయ్యి ఇప్పుడు అధిక ధరలకు అమ్ముతున్నారని, కొన్ని వ్యవహారాలు అధికార కాలంలోనే ప్రారంభమయ్యాయని వ్యాఖ్యలు వినిపిస్తున్నాయి. అలాగే తిరుమల తిరుపతి దేవస్థానాలు నెయ్యి సరఫరా అంశంపై కూడా ప్రశ్నలు లేవనెత్తుతున్నారు.

ఇదే సమయంలో మీడియా కథనాలపై కూడా వివాదం మరింత వేడెక్కింది. సాక్షి మీడియా ప్రచురించిన కథనాలపై హెరిటేజ్ సంస్థ పరువు నష్టం కేసు దాఖలు చేసింది. ఈ వ్యవహారం ఢిల్లీ హైకోర్టు దృష్టికి వెళ్లగా, సంస్థకు వ్యతిరేకంగా వచ్చిన కథనాలు, వీడియో లింక్‌లు వెంటనే తొలగించాలని కోర్టు ఆదేశించింది. సంబంధిత ప్రచారాలను నిలిపివేయాలని కూడా స్పష్టం చేసింది.

ఈ పరిణామాలన్నీ చూస్తే ఏపీ రాజకీయాలు మరింత హీట్ పెరిగేలా కనిపిస్తుంది. అయితే ప్రభుత్వం మాత్రం ఇరు సంస్థల మధ్య యాజమాన్య సంబంధం లేదని తేల్చి చెబుతోంది. తదుపరి పరిణామాలు ఎలా ఉండబోతాయన్నది ఇప్పుడు ఆసక్తికరంగా మారింది.