Heavy Rain: ఉదయం ఉక్కపోత.. సాయంత్రం ఊచకోత.. విశాఖలో ఒక్కసారిగా మారిన వాతావరణం.. ఉరుములు, మెరుపులతో భారీ వర్షం..! | విశాఖపట్నం వార్తలు (Visakhapatnam News)

ఆర్కే బీచ్, జగదాంబ జంక్షన్, సీతమ్మధార, గాజువాక, ద్వారకానగర్, మద్దిలపాలెం, ఎంవీపీ కాలనీ, సిహాచలం, గోపాలపట్నం సహా పలు ప్రధాన ప్రాంతాల్లో భారీ వర్షం కురవడంతో రోడ్లన్నీ జలమయమయ్యాయి. కొద్ది నిమిషాల వర్షానికే లోతట్టు ప్రాంతాల్లో నీరు నిలిచిపోవడంతో వాహనదారులు తీవ్ర ఇబ్బందులు ఎదుర్కొన్నారు. రోడ్లపై భారీగా నీరు చేరడంతో ట్రాఫిక్ నెమ్మదించింది. ఉద్యోగులు, విద్యార్థులు, ఇంటికి బయలుదేరిన ప్రజలు గంటల పాటు ట్రాఫిక్‌లో చిక్కుకుపోయారు.

మరోవైపు భారీ ఈదురుగాలులు నగరాన్ని వణికించాయి. పలుచోట్ల చెట్ల కొమ్మలు విరిగి రోడ్లపై పడగా.. కొన్ని ప్రాంతాల్లో హోర్డింగ్స్ ఊగిపోయాయి. భద్రతా కారణాల దృష్ట్యా అధికారులు ముందస్తు చర్యగా కొన్ని ప్రాంతాల్లో విద్యుత్ సరఫరాను తాత్కాలికంగా నిలిపివేశారు. దీంతో వర్షం ఒకవైపు ఉపశమనం ఇచ్చినా.. మరోవైపు కరెంటు కోతలతో ప్రజలు కొంత అసౌకర్యానికి గురయ్యారు. కేవలం విశాఖలోనే కాకుండా.. విజయనగరం జిల్లాలో కూడా భారీ వర్షం కురిసినట్లు తెలుస్తోంది.

గత కొన్ని రోజులుగా తీవ్ర ఎండలు, భరించలేని ఉక్కపోతతో అల్లాడిపోయిన నగరవాసులకు ఈ వర్షం మాత్రం కాస్త ఊరటనిచ్చింది. వర్షం ప్రారంభం కాగానే చాలా మంది ఆనందంగా వర్షాన్ని ఆస్వాదించారు. ఆర్కే బీచ్ ప్రాంతంలో సముద్ర తీరానికి వచ్చిన యువత, కుటుంబాలు చల్లని వాతావరణాన్ని ఎంజాయ్ చేస్తూ కనిపించారు. పిల్లలు వర్షంలో తడుస్తూ సందడి చేయగా.. వేడి వాతావరణం నుంచి తాత్కాలిక ఉపశమనం లభించడంతో ప్రజలు ఊపిరి పీల్చుకున్నారు.

అయితే వాతావరణ శాఖ మరిన్ని ఉరుములు, మెరుపులతో కూడిన వర్షాలు కురిసే అవకాశముందని హెచ్చరిస్తోంది. ముఖ్యంగా సముద్ర తీర ప్రాంత ప్రజలు అప్రమత్తంగా ఉండాలని సూచించింది. ఈదురుగాలుల కారణంగా చెట్ల కింద నిలబడకూడదని, అత్యవసరం లేకపోతే బయటకు రావద్దని అధికారులు హెచ్చరిస్తున్నారు. మొత్తానికి ఒక్కసారిగా మారిపోయిన వాతావరణం విశాఖ నగరానికి చల్లని ఉపశమనం ఇచ్చినా.. ట్రాఫిక్, విద్యుత్ సమస్యలతో నగరవాసులను కొంతసేపు ఇబ్బందులకు గురిచేసింది.