JEE Main Results 2026: జేఈఈలో ఇరగదీసిన ఏపీ కుర్రాళ్లు.. ఆ విద్యార్థికి ఏకంగా 300కి 300 మార్కులు | ఆంధ్రప్రదేశ్ వార్తలు

ఈసారి దేశవ్యాప్తంగా జేఈఈ మెయిన్ పరీక్షల్లో దేశవ్యాప్తంగా 12 మందికి మాత్రమే 100 పర్సంటైల్ స్కోరు సాధించి అదరగొట్టారు. అందులో ముగ్గురు తెలుగు వారు ఉన్నారు. ఏపీ నుంచి నరేంద్రబాబు గారి మహిత్, పసల మోహిత్, తెలంగాణ నుంచి వివాన్ శరద్ మహిశ్వరి అద్భుతంగా రాణించి 100 పర్సంటైల్ స్కోరు సాధించారు. వీరిలో ఏపీకి చెందిన ఇద్దరు విద్యార్థుల్లో పసల మోహిత్ కడప జిల్లాకు చెందిన విద్యార్థి. నరేంద్ర బాబు గారి మహిత్ తిరుపతిలోని ఓ ప్రముఖ కళాశాలలో విద్యాభ్యాసం చేస్తున్నట్లు తెలుస్తోంది. విజయవాడ శ్రీచైతన్య క్యాంపస్‌లో చదువుతున్న వైఎస్సార్ కడప జిల్లా జమ్మలమడుగుకు చెందిన పసల మోహిత్ 300కి 300 మార్కులు సాధించి అందరినీ ఆశ్చర్యపర్చాడు. ఈ మార్కులు సాధించడంతో రెండో విడత పరీక్ష తర్వాత విడుదలయ్యే తుది ర్యాంకుల్లో ఉత్తమ ర్యాంకు సాధిస్తాడని నిపుణులు అభిప్రాయపడుతున్నారు.

పసల మోహిత్, నరేంద్రబాబుగారి మహిత్

వీరిలో పసల మోహిత్, వివాన్ శరద్ మహిశ్వరి 100 పర్సంటైల్ స్కోరుతో జనరల్ కేటగిరీలో టాపర్లుగా నిలవడం విశేషం. అలాగే నరేంద్ర బాబు గారి మహిత్ ఓబీసీ(ఎన్‌సీఎల్) కేటగిరీలో టాపర్‌గా నిలిచారు. ఇంకోవైపు, మరో 68 మంది స్కోరును ఎన్‌టీఏ ప్రకటించలేదు. ఇందుకు గల కారణాన్ని ఎన్‌టీఏ తెలిపింది. గుర్తింపు ధ్రువీకరణ తదితర అంశాల్లో అక్రమ పద్ధతులకు పాల్పడినందుకు వీరి ఫలితాలు వెల్లడించలేదని స్పష్టం చేసింది. ఇంకోవైపు జేఈఈ మెయిన్ పేపర్-2 ఫలితాలను తర్వాత విడుదల చేస్తామని చెప్పింది. దేశంలోని ప్రతిష్ఠాత్మక విద్యాసంస్థలు అయిన ఎన్‌ఐటీలు, ట్రిపుల్ ఐటీలలో 2026-27 విద్యా సంవత్సరానికి బీటెక్ ప్రవేశాలు జరిగాయి. ఇందుకు జనవరి 21-28 తేదీల మధ్య జేఈఈ మెయిన్-2026 తొలి విడత పేపర్-1 పరీక్షలు జరగ్గా.. ఇందులో మొత్తం 13.55 లక్షల మంది దరఖాస్తు చేసుకున్నారు. అందులో 13.04 లక్షల మంది పరీక్షకు హాజరయ్యారు.