Cricket Betting: వీడి టార్గెట్ మహిళలే.. మాటలతో నమ్మిస్తాడు.. ఆ తర్వాత లక్షలు కొల్లగొడతాడు కిలాడీ మోసగాడి డేటింగ్ ఉచ్చు | ఆంధ్రప్రదేశ్ వార్తలు

నిందితుడు అత్యంత చాకచక్యంగా యువతులను బుట్టలో వేసుకోవడంలో సిద్ధహస్తుడు. మ్యాట్రిమోనియల్ మరియు డేటింగ్ సైట్లలో నకిలీ ప్రొఫైల్స్‌తో యువతులకు రిక్వెస్ట్‌లు పంపిస్తాడు. అవతలి వైపు నుంచి స్పందన రాగానే మెల్లగా మాటలు కలిపి, తనది చాలా పెద్ద కుటుంబమని, తనకు అనేక వ్యాపారాలు ఉన్నాయని నమ్మిస్తాడు. కొద్దిరోజుల పరిచయం తర్వాత, వ్యాపారంలో అత్యవసరంగా పెట్టుబడి పెట్టాలని లేదా ఏదో ఒక ఆర్థిక ఇబ్బంది ఉందని చెప్పి వారి నుంచి డబ్బు అడగడం ప్రారంభిస్తాడు. యువతులు తమ వద్ద నగదు లేదని చెబితే, వారి పేరుతో లోన్లు తీసుకునేలా ప్రోత్సహించి, ఆ మొత్తాన్ని తన ఖాతాలోకి మళ్లించుకుంటాడు.

కేవలం యువతులనే కాకుండా, నిరుద్యోగులను కూడా ఈ నిందితుడు వదిలిపెట్టలేదు. గతంలో ఒక సాఫ్ట్‌వేర్ కంపెనీలో హెచ్‌ఆర్ (HR) విభాగంలో పనిచేసిన అనుభవం ఉండటంతో, దాన్ని అడ్డం పెట్టుకుని అనేక మోసాలకు తెరలేపాడు. ప్రముఖ కంపెనీల్లో ఉద్యోగాలు ఇప్పిస్తానని, ఎన్ఏసీ (NAC) సర్టిఫికేట్లు ఇప్పిస్తానని నమ్మబలికి సుమారు 50 మంది నుంచి పెద్ద మొత్తంలో వసూళ్లకు పాల్పడ్డాడు. బాధితులు గట్టిగా నిలదీస్తే దుర్భాషలాడటం, బెదిరించడం వంటి పనులకు పాల్పడేవాడని పోలీసులు గుర్తించారు.

ఈ కిలాడీ మోసగాడు పోలీసులకు చిక్కకుండా ఉండేందుకు అత్యంత తెలివిగా వ్యవహరించేవాడు. బాధితుల నుంచి తీసుకున్న డబ్బును నేరుగా తన బ్యాంక్ ఖాతాలోకి తీసుకునేవాడు కాదు. క్రికెట్ బెట్టింగ్ యాప్‌లకు సంబంధించిన యూపీఐ (UPI) క్యూఆర్ కోడ్‌లను బాధితులకు పంపి, నేరుగా ఆ యాప్‌లలోకి డబ్బులు జమ చేయించేవాడు. ఇలా చేయడం వల్ల తన ఖాతాలో ఎలాంటి లావాదేవీలు ఉండవని, పోలీసులు తనను పట్టుకోలేరని భావించాడు. కానీ, సాంకేతిక ఆధారాల సాయంతో విజయవాడ సైబర్ పోలీసులు నిందితుడిని ఎట్టకేలకు అదుపులోకి తీసుకున్నారు.

ప్రస్తుతానికి ఉభయ తెలుగు రాష్ట్రాల్లో ఈ నిందితుడిపై సుమారు 12 కేసులు నమోదయ్యాయి. అయితే, సమాజంలో పరువు పోతుందనే భయంతో మరికొందరు బాధితులు ఫిర్యాదు చేయడానికి ముందుకు రావడం లేదని పోలీసులు అనుమానిస్తున్నారు. ఈ కిలాడీ మోసగాడి బారిన పడి ఎవరైనా మోసపోయి ఉంటే ధైర్యంగా ముందుకు వచ్చి ఫిర్యాదు చేయాలని సైబర్ క్రైమ్ విభాగం వారు సూచిస్తున్నారు.