ED Raids: మాజీ ప్రభుత్వ విప్ చెవిరెడ్డి భాస్కర్ రెడ్డి నివాసంలో ఈడీ దాడులు! భారీ ఆర్థిక లావాదేవీలపై ఆరా? |

నివాసంలోకి ఎవరినీ అనుమతించకుండా కట్టుదిట్టమైన భద్రత మధ్య ఈ తనిఖీలు కొనసాగుతున్నాయి. అధికారుల చర్యలు అత్యంత గోప్యంగా, పకడ్బందీగా సాగుతుండటంతో స్థానికంగా ఉద్రిక్త పరిస్థితులు నెలకొన్నాయి.ఈ సోదాలు కేవలం చెవిరెడ్డి ఇంటికే పరిమితం కాకుండా, మొత్తం 10 ప్రత్యేక బృందాలు ఏకకాలంలో హైదరాబాద్, విజయవాడ, తిరుపతి, నెల్లూరు ప్రాంతాల్లో పలువురు సన్నిహితుల ఇళ్లలో తనిఖీలు చేపట్టినట్లు సమాచారం.

ఈ క్రమంలో గోవిందరెడ్డి, భాస్కర్‌రెడ్డి, ధనంజయరెడ్డి, రాజ్ కసిరెడ్డి నివాసాల్లో ఈడీ అధికారులు సోదాలు నిర్వహిస్తున్నారు. ఒకేసారి అనేక ప్రాంతాల్లో ఈ దాడులు జరగడం వెనుక పెద్ద ఎత్తున ఆర్థిక లావాదేవీలపై దర్యాప్తు జరుగుతోందనే అనుమానాలు వ్యక్తమవుతున్నాయి. ఈ పరిణామం రాజకీయ వర్గాల్లో తీవ్ర ఆసక్తిని రేకెత్తిస్తోంది.

అయితే సోదాల సమయంలో చెవిరెడ్డి భాస్కర్ రెడ్డి, ఆయన కుమారుడు చెవిరెడ్డి మోహిత్ ఇంట్లో లేరని సమాచారం. దీంతో అధికారులు ఇంటికి తాళం వేసి బయటే వేచి ఉన్నట్లు తెలుస్తోంది. కుటుంబ సభ్యులు లేదా సంబంధిత వ్యక్తులు వచ్చే వరకు అధికారులు అక్కడే మోహరించి పరిస్థితిని పర్యవేక్షిస్తున్నారు.

చెవిరెడ్డి కుటుంబానికి సంబంధించిన ఆర్థిక వ్యవహారాలపై ఈ సోదాలు జరుగుతున్నాయా? లేక మరేదైనా కేసు విచారణలో భాగమా? అన్న దానిపై అధికారిక వివరాలు ఇంకా వెల్లడి కాలేదు. అయితే ఈ పరిణామం రాజకీయంగా ప్రాధాన్యత సంతరించుకోవడంతో మరిన్ని వివరాల కోసం అందరూ ఆసక్తిగా ఎదురుచూస్తున్నారు.