Machilipatnam: మ్యారేజ్ బ్యూరోలో పరిచయం.. ఆ తర్వాత ముఠాగా మారి.. పసికందులను.. ఛీ..ఛీ ఏం మనుషులు! | ఆంధ్రప్రదేశ్ వార్తలు

ఈనాడు కథనం ప్రకారం.. ఈ ముఠా ఏర్పడిన తీరు చాలా విచిత్రంగా ఉంది. మ్యారేజ్ బ్యూరో ద్వారా పరిచయమైన వీరికి, సంతానం లేని దంపతులు దత్తత కోసం ఎదురుచూస్తున్నారనే సమాచారం అందింది. దీనిని ఒక అవకాశంగా తీసుకున్న నిందితులు, మొదట తమకు తెలిసిన కొందరు యాచకుల పిల్లలను దంపతులకు ఇచ్చి కొంత సొమ్ము తీసుకున్నారు. ఆ తర్వాత ఇది ఒక లాభసాటి వ్యాపారంగా మలచుకున్నారు. యాచకులు, సంచార జాతులు, మరియు ఆర్థికంగా అత్యంత వెనుకబడిన వారిని లక్ష్యంగా చేసుకుని, వారికి కొద్దిపాటి డబ్బు ఆశచూపి పిల్లలను కొనుగోలు చేయడం ప్రారంభించారు.

కేవలం కొనుగోలు చేయడమే కాకుండా, వీరు అపహరణలకు కూడా ఒడిగట్టారు. విజయవాడ ఆటోనగర్‌లో భిక్షాటన చేసే సుమమ్మ అనే మహిళ వద్ద ఉన్న 10 నెలల బాబుని, అలాగే ఒడిశా నుంచి కూలీ పనుల కోసం వచ్చిన ఒక మహిళ దుర్గగుడిని దర్శించుకోవడానికి వచ్చిన సమయంలో మాయమాటలు చెప్పి ఆమె వద్ద ఉన్న 16 నెలల బాబుని ఈ ముఠా అపహరించింది. ఇలా అపహరించిన పసికందులను తమ సొంత పిల్లలుగా చిత్రించి విజయవాడ వన్ టౌన్, మచిలీపట్నం వంటి ప్రాంతాల్లో సంతానం లేని దంపతులకు భారీ ధరలకు విక్రయించారు.

ఈ ముఠాలో ప్రధాన సూత్రధారిగా వ్యవహరిస్తున్న మహిళకు నేర చరిత్ర ఉంది. గతంలో సూర్యాపేటలో కన్నవారి వద్దే ఒక పసికందును కొనుగోలు చేసి వేరే వారికి విక్రయించిన కేసులో ఈమె నిందితురాలు. కేవలం ఆంధ్రప్రదేశ్‌లోనే కాకుండా, ఉత్తరాది రాష్ట్రాలకు చెందిన గ్యాంగులతోనూ ఈ ముఠాకు సంబంధాలు ఉన్నట్లు పోలీసులు అనుమానిస్తున్నారు. ఈ ముఠాలో ముగ్గురు మహిళలు సహా నలుగురు పురుషులను పోలీసులు ఇప్పటికే అదుపులోకి తీసుకున్నారు.

పోలీసుల ప్రాథమిక విచారణలో ఈ ముఠా ఇప్పటివరకు సుమారు ఐదుగురు పసికందులను విక్రయించినట్లు ఆధారాలు లభించాయి. ఒడిశా మహిళకు చెందిన బాబుని పోలీసులు రక్షించగా, ఆ పిల్లాడి కోసం బెంగళూరు వరకు వెళ్లిన తల్లికి సమాచారం అందించారు. మిగిలిన ముగ్గురు పిల్లలు ఎక్కడ ఉన్నారు, ఎవరికి విక్రయించారు అనే కోణంలో పోలీసులు విచారణ ముమ్మరం చేశారు.