AU art exhibition: ఏయూ విద్యార్థుల క్రియేటివిటీకి విశాఖ ప్రజలకు ఫిదా.. ఆర్ట్ ఎగ్జిబిషన్‌లో అద్భుతాలు..! Fine Arts students’ artworks are amazing. | విశాఖపట్నం వార్తలు (Visakhapatnam News)

ఏయూ ఫైన్ ఆర్ట్స్ విద్యార్థులు, పూర్వ విద్యార్థులు, అధ్యాపకులు కలిసి ఈ ప్రదర్శనను రూపొందించడం విశేషం. వారి సృజనలో ప్రతిబింబించిన నైపుణ్యం, ఊహాశక్తి ప్రతి ఒక్కరినీ ఆకర్షిస్తోంది. విశాఖ నగరానికి చెందిన ప్రజలు, వివిధ కళాశాలల విద్యార్థులు పెద్ద సంఖ్యలో ఈ ఎగ్జిబిషన్‌ను సందర్శిస్తూ కళాఖండాలను ఆసక్తిగా వీక్షిస్తున్నారు. ప్రతి కళాఖండం వెనుక ఉన్న భావం, కథను విద్యార్థులే స్వయంగా వివరించడం ఈ ప్రదర్శనకు మరింత ప్రత్యేకతను తెచ్చింది.

ప్రదర్శనలో కొన్ని చిత్రాలు నిత్య జీవితానికి అద్దం పడుతున్నాయి. పూర్వం రైతులు పొలాల్లో అరటి ఆకుపై భోజనం చేసే దృశ్యాన్ని ప్రతిబింబించిన చిత్రం సందర్శకులను ఆకట్టుకుంటోంది. అలాగే మహిళ జడ ద్వారా వ్యక్తిత్వాన్ని చూపించిన ఆర్ట్ వర్క్, స్త్రీల రోజువారీ జీవితాన్ని రంగులతో చూపించిన చిత్రాలు ప్రత్యేకంగా నిలుస్తున్నాయి. ఈ కళాఖండాలు కేవలం అందాన్ని మాత్రమే కాదు, మన సంస్కృతి, సంప్రదాయాలను కూడా ప్రతిబింబిస్తున్నాయి.

ఇంకా కొంతమంది విద్యార్థులు చక్కలతో, కంచు లోహాలతో, ఫైబర్ మెటీరియల్స్‌తో రూపొందించిన శిల్పాలు చూపరులను ఆశ్చర్యానికి గురిచేస్తున్నాయి. వ్యర్థ పదార్థాలతో తయారు చేసిన ఆర్ట్ పీసెస్ సృజనాత్మకతకు నిదర్శనంగా నిలుస్తున్నాయి. ప్రతి కళాఖండంలో ఒక సందేశం దాగి ఉండటం ఈ ఎగ్జిబిషన్ ప్రత్యేకతగా మారింది.

ఈ ప్రదర్శన కేవలం కళలకే పరిమితం కాకుండా, ఫైన్ ఆర్ట్స్ కోర్స్ అవకాశాలను కూడా తెలియజేస్తోంది. రెండు సంవత్సరాలు, నాలుగు సంవత్సరాల కోర్సులు పూర్తి చేస్తే కళారంగంలో మంచి అవకాశాలు ఉన్నాయని నిపుణులు చెబుతున్నారు. ముఖ్యంగా టీచర్ ట్రైనింగ్ టెక్నికల్ సర్టిఫికెట్ ద్వారా ప్రభుత్వ ఉద్యోగాలకు కూడా మార్గం సుగమమవుతుందని పేర్కొంటున్నారు.

మొత్తానికి, ఏయూ విద్యార్థుల ప్రతిభ, సృజనాత్మకతను ప్రత్యక్షంగా చూసే అవకాశం ఈ ఎగ్జిబిషన్ అందిస్తోంది. కళలంటే ఇష్టమున్నవారికి ఇది ఒక మంచి అనుభవంగా మారుతుండగా, యువతలో కొత్త ఆలోచనలకు, సృజనకు దారితీస్తోంది.