తమిళనాడులో చంద్రబాబు ప్రచారం.. ఇండీ కూటమిపై నిప్పులు చెరిగిన సీఎం ! | ఆంధ్రప్రదేశ్ వార్తలు

మహిళా రిజర్వేషన్లు అమలైతే చట్టసభల్లో మహిళల ప్రాతినిధ్యం పెరిగి దేశాభివృద్ధి వేగవంతం అవుతుందని సీఎం పేర్కొన్నారు. 2029 ఎన్నికల నుంచే ఈ చట్టం అందుబాటులోకి రావాలని ప్రధాని మోదీ భావించినప్పటికీ, కాంగ్రెస్-డీఎంకే వైఖరి వల్ల ఆ అవకాశం చేజారిందని గుర్తు చేశారు. అసెంబ్లీ సీట్లు 50 శాతం పెరుగుతాయని స్పష్టంగా తెలుస్తున్నా, డీ-లిమిటేషన్ బిల్లును వ్యతిరేకించడం వెనుక ఉన్న మతలబు ఏమిటని ప్రశ్నించారు. ఈ నిర్ణయం వల్ల ఒక్క మహిళలే కాకుండా దక్షిణాది రాష్ట్రాలు కూడా తీవ్రంగా నష్టపోయాయని ఆరోపించారు.

దక్షిణాది ప్రయోజనాలపై మాట్లాడుతూ, 2027 సెన్సెస్ ప్రాతిపదికన ముందుకు సాగితే ఏపీ, తెలంగాణ, తమిళనాడు వంటి రాష్ట్రాలకు అన్యాయం జరుగుతుందని హెచ్చరించారు. గతంలో తాను ఉమ్మడి ఏపీ సీఎంగా ఉన్నప్పుడు తమిళనాడు దాహార్తిని తీర్చడానికి తెలుగు గంగ ప్రాజెక్టును ఎలా చేపట్టారో వివరించారు. ప్రస్తుతం ఏపీలో నదుల అనుసంధానం వేగంగా జరుగుతోందని, భవిష్యత్తులో గంగా-కావేరీ నదులను కలిపితే దేశంలో నీటి కొరత అనేదే ఉండదని తన దార్శనికతను పంచుకున్నారు.

ప్రజాస్వామ్యంలో ప్రతి ప్రభుత్వం జవాబుదారీతనంతో, పారదర్శకతతో పనిచేయాలని చంద్రబాబు హితవు పలికారు. ప్రజలు వాస్తవాలను గమనించి అభివృద్ధికి అండగా నిలవాలని కోరారు. కోయంబత్తూరులో మీడియా సమావేశం అనంతరం ముఖ్యమంత్రి హోసూరుకు బయలుదేరారు. అక్కడ తళ్లి నియోజకవర్గంలో ఏర్పాటు చేసిన భారీ బహిరంగ సభలో పాల్గొని ఎన్డీఏ అభ్యర్థుల తరపున ఎన్నికల ప్రచారాన్ని హోరెత్తించనున్నారు.