Last Updated:
అయితే, ఇది కేవలం ఆరంభం మాత్రమేనని, మే నెలలో ఎండల తీవ్రత మరింత ఉగ్రరూపం దాల్చనుందని వాతావరణ నిపుణులు హెచ్చరిస్తున్నారు.
Hot Temperatures: వేసవిలో భానుడు తన ప్రతాపాన్ని మొదలుపెట్టాడు. ఏప్రిల్ నెలలోనే పగటి ఉష్ణోగ్రతలు 40 డిగ్రీల మార్కును దాటుతుండటంతో రాష్ట్రవ్యాప్తంగా ప్రజలు అల్లాడిపోతున్నారు. అయితే, ఇది కేవలం ఆరంభం మాత్రమేనని, మే నెలలో ఎండల తీవ్రత మరింత ఉగ్రరూపం దాల్చనుందని వాతావరణ నిపుణులు హెచ్చరిస్తున్నారు. ముఖ్యంగా రాజస్థాన్లోని థార్ ఎడారి నుంచి వీచే వేడి గాలులు మన వైపు దూసుకువచ్చే అవకాశం ఉందని, దీంతో మే చివరి వారంలో వడగాలుల ముప్పు పొంచి ఉందని అంచనా వేస్తున్నారు.
ఈనాడు కథనం ప్రకారం.. రాజస్థాన్లోని థార్ ఎడారిలో ఏర్పడే అతి ఉష్ణ వాయువులు (Heat Waves) మధ్యప్రదేశ్ మీదుగా ప్రయాణించి, కర్ణాటక సరిహద్దుల గుండా తొలుత రాయలసీమ జిల్లాల్లోకి ప్రవేశిస్తాయి. ఆ తర్వాత ఈ వేడి గాలులు క్రమంగా రాష్ట్రవ్యాప్తంగా విస్తరిస్తాయి. ఈ గాలుల ప్రభావం వల్ల సాధారణంగా నమోదయ్యే ఉష్ణోగ్రతల కంటే 3 నుంచి 5 డిగ్రీల మేర అధిక ఉష్ణోగ్రతలు నమోదవుతాయి. ప్రస్తుతం ఈ గాలుల గమనం ఇంకా ప్రారంభం కాలేదు, కానీ మే నెల ద్వితీయార్థంలో వీటి ప్రభావం స్పష్టంగా కనిపిస్తుందని భావిస్తున్నారు.
ప్రస్తుతం రాష్ట్రంలోని కొన్ని జిల్లాల్లో నమోదవుతున్న 40 డిగ్రీల పైచిలుకు ఉష్ణోగ్రతలు గ్రీన్హౌస్ ప్రభావం (Greenhouse Effect) మరియు స్థానిక వాతావరణ మార్పుల వల్ల ఏర్పడుతున్నవేనని నిపుణులు చెబుతున్నారు. ఏపీయూ వాతావరణ విభాగం అసిస్టెంట్ అధికారి సునీత తెలిపిన వివరాల ప్రకారం.. ఈ ఏడాది శక్తిమంతమైన ఎల్నినో (El Niño) ప్రభావం ఉండే అవకాశం ఉంది. ఒకవేళ ఎల్నినో ప్రభావం తీవ్రంగా ఉంటే, సాధారణం కంటే ఎండలు ఎక్కువగా ఉండటమే కాకుండా వర్షాకాలంపై కూడా దాని ప్రభావం పడే అవకాశం ఉంది. దీనిపై ఏప్రిల్ చివరి నాటికి ఒక స్పష్టమైన అంచనా వచ్చే అవకాశం ఉందని ఆమె పేర్కొన్నారు.
మే నెలలో సూర్యుడు నిప్పులు చెరుగుతాడు కాబట్టి, ప్రజలు అప్రమత్తంగా ఉండాలని వైద్యులు సూచిస్తున్నారు.
మధ్యాహ్న సమయం: ఉదయం 11 గంటల నుంచి సాయంత్రం 4 గంటల వరకు అత్యవసరమైతే తప్ప బయటకు రాకపోవడం మంచిది.
హైడ్రేషన్: దాహం వేయకపోయినా తరచుగా మంచినీరు, కొబ్బరి నీళ్లు, మజ్జిగ వంటి పానీయాలు తీసుకోవాలి.
వేషధారణ: వదులుగా ఉండే కాటన్ దుస్తులను ధరించాలి. బయటకు వెళ్లేటప్పుడు గొడుగు లేదా టోపీని తప్పనిసరిగా వాడాలి.
ఆహారం: నూనె పదార్థాలు, మాంసాహారం తగ్గించి, శరీరానికి చలువ చేసే పండ్లు, కూరగాయలు తీసుకోవాలి.
ముఖ్యంగా వృద్ధులు, గర్భిణీలు మరియు చిన్న పిల్లల విషయంలో అత్యంత జాగ్రత్తగా ఉండాలని యంత్రాంగం హెచ్చరిస్తోంది. ప్రభుత్వం కూడా వడగాలుల ముప్పును ఎదుర్కోవడానికి జిల్లా యంత్రాంగాలను సిద్ధం చేస్తోంది. చలివేంద్రాల ఏర్పాటు, ఓఆర్ఎస్ ప్యాకెట్ల పంపిణీ వంటి చర్యలు చేపట్టాలని ఆదేశాలు జారీ చేసింది.
Click here to add News18 as your preferred news source on Google. ఆంధ్రప్రదేశ్లోని ముఖ్యమైన వార్తలు, లేటెస్ట్ న్యూస్, స్థానిక వార్తలు, ప్రభుత్వ పథకాలు, ప్రభుత్వ ప్రకటనలు, అన్ని రాజకీయ పార్టీలకు సంబంధించిన స్టోరీలను న్యూస్18 తెలుగు ఆంధ్రప్రదేశ్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
