Last Updated:
గుంటూరు కనమర్లపూడి వద్ద జాతీయ రహదారిపై మినీ లారీ ఢీకొని విద్యార్థి నంబూరి రవీంద్ర మృతి, కుటుంబం గ్రామం శోకసంద్రం, స్థానికులు వేగ నియంత్రణ కోరుతున్నారు
గుంటూరు జిల్లా కనమర్లపూడి (శావల్యాపురం) పరిధిలో ఒక విషాదకరమైన సంఘటన చోటుచేసుకుంది. సామాన్య మధ్యతరగతి కుటుంబానికి చెందిన ఒక ఆశాకిరణం, రోడ్డు ప్రమాదం రూపంలో అర్ధాంతరంగా ఆరిపోయింది. టిఫిన్ తీసుకురావడానికి ద్విచక్ర వాహనంపై బయలుదేరిన ఒక విద్యార్థిని, అతివేగంగా వచ్చిన మినీ లారీ బలితీసుకుంది. ఈ ఘటన స్థానికంగా తీవ్ర విషాదాన్ని నింపింది.
స్థానిక ఎస్సీ కాలనీకి చెందిన నంబూరి రవీంద్ర (17) అనే యువకుడు గురువారం ఉదయం తన ద్విచక్ర వాహనంపై టిఫిన్ తీసుకురావడానికి ప్రధాన కూడలి వైపు బయలుదేరాడు. కర్నూలు-గుంటూరు జాతీయ రహదారిపై కనమర్లపూడి ఎస్సీ కాలనీ సమీపంలోకి రాగానే, వినుకొండ వైపు నుంచి అతివేగంగా వస్తున్న ఒక మినీ లారీ రవీంద్ర వాహనాన్ని బలంగా ఢీకొట్టింది.
ప్రమాద ధాటికి రవీంద్ర వాహనంపై నుండి కిందపడిపోగా, అతని తల రోడ్డుకు బలంగా తగిలింది. తీవ్ర రక్తస్రావం కావడంతో రవీంద్ర అక్కడికక్కడే ప్రాణాలు విడిచాడు. క్షణాల్లో జరిగిన ఈ ఘోరం చూసి స్థానికులు నిర్ఘాంతపోయారు. సమాచారం అందుకున్న ఎస్సై మోర్ల వెంకటేశ్ బాబు వెంటనే సంఘటనా స్థలానికి చేరుకుని పరిస్థితిని సమీక్షించారు. అనంతరం మృతదేహాన్ని పోస్టుమార్టం నిమిత్తం వినుకొండ ప్రభుత్వ ఆసుపత్రికి తరలించి, కేసు నమోదు చేసి దర్యాప్తు ప్రారంభించారు.
రవీంద్ర కుటుంబ నేపథ్యం అత్యంత దయనీయంగా ఉంది. అతని తండ్రి నంబూరి డేవిడ్ తాపీ పనులు చేసుకుంటూ కుటుంబాన్ని పోషిస్తున్నారు. డేవిడ్కు ఇద్దరు కుమారులు కాగా, రవీంద్ర పెద్దవాడు. సిమెంట్ పనుల కోసం రవీంద్ర తల్లిదండ్రులు ఇటీవల హైదరాబాద్కు వెళ్లారు. దీంతో రవీంద్ర తన తాతయ్య పేరయ్య వద్ద ఉంటూ చదువుకుంటున్నాడు.
తల్లిదండ్రులు దూరంగా ఉన్నా, తాతయ్యకు ఆసరాగా ఉంటూ బాధ్యతగా మెలిగేవాడని స్థానికులు గుర్తు చేసుకుంటున్నారు. చేతికి అందివచ్చిన కుమారుడు ఇలా కళ్లముందే విగతజీవిగా పడి ఉండటం చూసి కుటుంబ సభ్యులు గుండెలవిసేలా రోదిస్తున్నారు. రవీంద్ర ఇటీవలనే పదో తరగతి పరీక్షలు రాశాడు. ఫలితాల కోసం ఆత్రుతగా ఎదురుచూస్తున్న తరుణంలో ఈ ప్రమాదం జరిగింది.
“పది ఫలితాలు రాగానే ఇంటర్ చదవాలి, మంచి ప్రయోజకుడిని కావాలి” అని రవీంద్ర ఎప్పుడూ చెబుతుండేవాడని అతని తల్లిదండ్రులు కన్నీరుమున్నీరవుతున్నారు. మంచి భవిష్యత్తు ఉన్న ఒక విద్యార్థి, ఫలితాలు చూడకుండానే అనంత లోకాలకు వెళ్లిపోవడం ఆ గ్రామంలో అందరినీ కంటతడి పెట్టించింది. తల్లిదండ్రుల కష్టాన్ని తీరుస్తాడనుకున్న కొడుకు, వారికి తీరని శోకాన్ని మిగిల్చి వెళ్లిపోయాడు.
జాతీయ రహదారులపై మితిమీరిన వేగంతో ప్రయాణించే వాహనాల వల్ల ఇలాంటి అమాయక ప్రాణాలు బలైపోతున్నాయి. అధికారులు వేగ నియంత్రణపై దృష్టి సారించాలని, ముఖ్యంగా నివాస ప్రాంతాల వద్ద హెచ్చరిక బోర్డులు, స్పీడ్ బ్రేకర్లు ఏర్పాటు చేయాలని స్థానికులు కోరుతున్నారు.
Click here to add News18 as your preferred news source on Google. ఆంధ్రప్రదేశ్లోని ముఖ్యమైన వార్తలు, లేటెస్ట్ న్యూస్, స్థానిక వార్తలు, ప్రభుత్వ పథకాలు, ప్రభుత్వ ప్రకటనలు, అన్ని రాజకీయ పార్టీలకు సంబంధించిన స్టోరీలను న్యూస్18 తెలుగు ఆంధ్రప్రదేశ్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
