ప్రకృతి మధ్యలో మైండ్ బ్లోయింగ్ స్పాట్.. కొండలు, అడవుల మధ్య అద్భుత జలపాతం..! |

వేసవి వేడి పెరిగేకొద్దీ సరియా జలపాతం వద్ద సందడి మరింత ఊపందుకుంది. ముఖ్యంగా వారాంతాల్లో అయితే అడుగుపెట్టడానికి కూడా చోటు లేకుండా సందర్శకులతో కిక్కిరిసిపోతుంది. చిన్నపిల్లల నుంచి పెద్దల వరకు కుటుంబ సమేతంగా వచ్చి చల్లని నీటి జల్లుల్లో సేదతీరుతూ ప్రకృతి మధ్యలో ఆనంద క్షణాలను ఆస్వాదిస్తున్నారు. ఒకే ప్రదేశంలో మూడు జలపాతాలు ఉండటం ఈ ప్రాంతానికి ప్రత్యేక ఆకర్షణగా నిలుస్తోంది. కొండల మధ్య నుంచి పారే ఈ మూడు జలపాతాలు చూడటానికి కనువిందు చేస్తూ, ఫోటోగ్రఫీకి అద్భుతమైన నేపథ్యాన్ని అందిస్తున్నాయి.

చుట్టూ పచ్చని కొండలు, దట్టమైన అడవులు, పక్షుల కిలకిలారావాలు ఇవన్నీ కలిసి సరియా జలపాతాన్ని ఒక ప్రకృతి స్వర్గధామంగా మార్చేశాయి. అక్కడి ప్రశాంత వాతావరణం నగర జీవనంలోని హడావిడిని మరిచిపోయేలా చేస్తోంది. ముఖ్యంగా యువత ఈ ప్రదేశాన్ని ఫోటోలు, వీడియోల కోసం బాగా ఎంచుకుంటూ సోషల్ మీడియాలో వైరల్ చేస్తున్నారు.

అయితే ఈ అందాల జలపాతాన్ని చేరుకోవడం అంత తేలికైన పని కాదు. దాదాపు 2 కిలోమీటర్ల మేర కొండప్రాంతంలో ట్రెక్కింగ్ చేయాల్సి ఉంటుంది. మార్గమంతా గుట్టలు, లోయలు, చెట్ల మధ్య గుండా సాగాల్సి రావడంతో పర్యాటకులు అప్రమత్తంగా ఉండాల్సి ఉంటుంది. ముఖ్యంగా వర్షాకాలంలో రాళ్లు జారిపడే ప్రమాదం ఉండటంతో మరింత జాగ్రత్త అవసరం అని స్థానికులు సూచిస్తున్నారు. ప్రభుత్వం సరైన రహదారి, సదుపాయాలు కల్పిస్తే ఈ ప్రదేశం మరింత అభివృద్ధి చెందే అవకాశం ఉందని వారు ఆశాభావం వ్యక్తం చేస్తున్నారు.

ఇంత అందమైన ప్రదేశాన్ని కేవలం 20 రూపాయల ప్రవేశ రుసుముతో చూడగలగడం కూడా పర్యాటకులకు మరింత ఆకర్షణగా మారింది. తక్కువ ఖర్చుతో సహజ సౌందర్యాన్ని ఆస్వాదించాలనుకునే వారికి సరియా జలపాతం ఒక అద్భుతమైన గమ్యస్థానంగా నిలుస్తోంది. సహజ అందాలు, సాహసభరితమైన ట్రెక్కింగ్, ప్రశాంత వాతావరణం ఇలా అన్నీ కలిసి ఈ జలపాతం ఇప్పుడు తప్పక సందర్శించాల్సిన టూరిస్ట్ స్పాట్‌గా వేగంగా గుర్తింపు పొందుతోంది.