Water Crisis: బ్రాందీకి కొరత లేదు.. నీళ్లకు దిక్కులేదు.. మహిళల ఆవేదన వైరల్..! dalit women protest with empty pots for drinking water in kottakota. | విశాఖపట్నం వార్తలు (Visakhapatnam News)

పంచాయతీ అధికారులు ప్రతి ఇంటికి హౌస్ టాక్స్ వసూలు చేస్తున్నప్పటికీ కనీసం మంచినీటి సదుపాయం కల్పించడం లేదని స్థానికులు మండిపడ్డారు. పబ్లిక్ కుళాయిలు వేసి నాలుగేళ్లు, ఇంటింటికీ ట్యాపులు అమర్చి మూడు సంవత్సరాలు అయినా ఒక్క బొట్టు నీరు రావడం లేదని ఆవేదన వ్యక్తం చేశారు. మొదట్లో కొద్దిరోజులు నీళ్లు ఇచ్చి ఆ తర్వాత పూర్తిగా నిలిపివేశారని, ఇప్పుడు రెండు రోజులకు ఒకసారి స్నానం చేయాల్సిన పరిస్థితి ఏర్పడిందని తెలిపారు.

జల జీవన్ మిషన్ ద్వారా కేంద్ర ప్రభుత్వం కోట్ల రూపాయలు మంజూరు చేసి ఇంటింటికీ కుళాయిలు ఏర్పాటు చేసినా అవి కేవలం పేరుకే ఉన్నాయని ప్రజలు విమర్శిస్తున్నారు. నీటి కోసం ఇతర ప్రాంతాలకు వెళ్లి తెచ్చుకోవాల్సి వస్తోందని, ఇది రోజువారీ భారంగా మారిందని చెబుతున్నారు. ప్రతి ఊరిలో బ్రాందీ షాపులు ఉన్నాయి, వాటికి ఎలాంటి కొరత లేదు.. కానీ తాగడానికి నీళ్లు మాత్రం దొరకడం లేదు అంటూ మహిళలు ఆగ్రహం వ్యక్తం చేశారు.

గతంలో పలుమార్లు ఆందోళనలు చేసినప్పటికీ అధికారులు తాత్కాలిక చర్యలకే పరిమితమవుతున్నారని ఆరోపించారు. ట్రాక్టర్లతో నీరు తీసుకువచ్చి ఫోటోలు తీసుకుని ప్రచారం చేసుకోవడం తప్ప శాశ్వత పరిష్కారం చూపడం లేదని మండిపడ్డారు. కొత్త ట్యాంకు నిర్మాణం పేరుతో పూజలు చేసినా ఇప్పటివరకు నీటి సరఫరా ప్రారంభం కాలేదని తెలిపారు.

ఇప్పటికైనా అధికారులు స్పందించి వెంటనే నీటి సమస్యను పరిష్కరించాలని మహిళలు డిమాండ్ చేస్తున్నారు. లేకపోతే రావికమతం ఎంపీడీవో కార్యాలయం వద్ద పెద్ద ఎత్తున ఖాళీ బిందెలతో ఆందోళనను మరింత ఉద్ధృతం చేస్తామని హెచ్చరించారు. ప్రజలకు ప్రాథమిక అవసరమైన నీరు అందించడంలో విఫలమవుతున్న వ్యవస్థపై ఈ నిరసన గళం బలంగా వినిపిస్తోంది.