Tirumala Temple: శ్రీవారి భక్తులకు శుభవార్త.. తిరుమలలో నకిలీ ఆధార్‌లకు చెక్.. టీటీడీ సరికొత్త సాంకేతిక విప్లవం! |

ప్రస్తుతం తిరుమలలో గదులు పొందాలన్నా లేదా లక్కీ డిప్ ద్వారా ఆర్జిత సేవలు పొందాలన్నా భక్తులు తమ ఆధార్ కార్డులను సమర్పిస్తున్నారు. అయితే, కొందరు వ్యక్తులు నకిలీ ఆధార్ కార్డులను సృష్టించి లేదా ఇతరుల గుర్తింపు కార్డులను ఉపయోగించి దర్శన టికెట్లు, గదులు పొందుతున్నట్లు టీటీడీ విజిలెన్స్ విభాగం గుర్తించింది. ప్రస్తుతం టీటీడీ వద్ద ఉన్న వ్యవస్థలో భక్తుడు సమర్పించిన ఆధార్ కార్డు అసలైనదా కాదా అని తక్షణమే నిర్ధారించే సాంకేతికత అందుబాటులో లేదు. దీనిని ఆసరాగా చేసుకుని దళారులు భక్తులను మోసం చేస్తున్నారు.

ఈ అక్రమాలకు చెక్ పెట్టేందుకు కేంద్ర ప్రభుత్వ సంస్థ అయిన యూనిక్ ఐడెంటిఫికేషన్ అథారిటీ ఆఫ్ ఇండియా (UIDAI) సేవలను వినియోగించుకోవాలని టీటీడీ ఉన్నతాధికారులు నిర్ణయించారు. ఇటీవల యూఐడీఏఐ ప్రతినిధులతో జరిగిన చర్చల్లో పలు కీలక నిర్ణయాలు తీసుకున్నారు.

ఏయూఏ (AUA) రిజిస్ట్రేషన్: టీటీడీని ‘అథెంటికేషన్ యూజర్ ఏజెన్సీ’గా నమోదు చేసుకోవాలని నిర్ణయించారు. దీనికోసం రెండేళ్ల కాలపరిమితికి గాను రూ. 20 లక్షల రిజిస్ట్రేషన్ ఫీజు చెల్లించాల్సి ఉంటుంది. ఆధార్ నిర్ధారణ కోసం జరిగే ప్రతి లావాదేవీకి 4 పైసలు, పూర్తి స్థాయి ఈ-కేవైసీ (e-KYC) ప్రక్రియ కోసం ఒక్కొక్కరికి రూ. 3.40 చొప్పున టీటీడీ చెల్లించాల్సి ఉంటుంది.

ఈ సేవలను పూర్తిస్థాయిలో వినియోగించుకోవాలంటే కేంద్ర ప్రభుత్వ నిబంధనల ప్రకారం రాష్ట్ర ప్రభుత్వం ప్రత్యేకంగా నోటిఫికేషన్ జారీ చేయాలి. ఈ ప్రక్రియను వేగవంతం చేసేందుకు టీటీడీ అధికారులు రాష్ట్ర ప్రభుత్వంతో సంప్రదింపులు జరుపుతున్నారు. ఆధార్ నిర్ధారణతో పాటు, టీటీడీ ఇప్పటికే ‘ఫేస్ రికగ్నిషన్’ టెక్నాలజీని ప్రయోగాత్మకంగా అమలు చేస్తోంది. భక్తులు దర్శనం చేసుకునే సమయంలో లేదా లడ్డూలు పొందే సమయంలో వారి ముఖాన్ని స్కాన్ చేయడం ద్వారా, వారు అదే రోజున మళ్లీ దర్శనానికి వస్తున్నారా లేదా అనే విషయాన్ని సిస్టమ్ గుర్తిస్తుంది. దీనివల్ల ఒకే టికెట్‌పై ఎక్కువ మంది దర్శనం చేసుకోవడం లేదా టోకెన్ల దుర్వినియోగం కావడం వంటివి తగ్గుతాయి.

భక్తులకు కలిగే ప్రయోజనాలు: గదుల కేటాయింపు లక్కీ డిప్‌లో సామాన్య భక్తులకు సమాన అవకాశాలు లభిస్తాయి. నకిలీ గుర్తింపు కార్డులతో మోసాలు చేసే మధ్యవర్తుల ఆటలు సాగవు. ఆధార్ నిర్ధారణ ఆన్‌లైన్ ద్వారా తక్షణమే జరగడం వల్ల కౌంటర్ల వద్ద వేచి ఉండే సమయం తగ్గుతుంది. అపరిచిత వ్యక్తులు నకిలీ కార్డులతో తిరుమల కొండపైకి ప్రవేశించకుండా భద్రతను పటిష్టం చేయవచ్చు.