Sri Rama Navami: శ్రీరామ నవమి వేడుకల్లో పాల్గొన్న నారా భువనేశ్వరీ.. భక్తులకు స్వయంగా ప్రసాదాల పంపిణీ! | చిత్తూరు వార్తలు (Chittoor News)

నారా భువనేశ్వరి కుప్పం పర్యటన కేవలం రాజకీయ పర్యటనగానే కాకుండా, ప్రజల కష్టసుఖాలను తెలుసుకునే ఒక వేదికగా మారింది. ముఖ్యంగా మహిళా శక్తిని చాటిచెప్పేలా ఆమె చేసిన వ్యాఖ్యలు నియోజకవర్గంలో చర్చనీయాంశమయ్యాయి.

శ్రీరామనవమి పర్వదినాన్ని పురస్కరించుకుని భువనేశ్వరి కుప్పంలోని చారిత్రక రామాలయాన్ని సందర్శించారు. ఆమె రాకను పురస్కరించుకుని ఆలయ అధికారులు, అర్చకులు పూర్ణకుంభంతో ఘన స్వాగతం పలికారు. వేద మంత్రోచ్ఛారణల నడుమ ఆమె స్వామివారికి ప్రత్యేక పూజలు నిర్వహించారు. అనంతరం ఆలయ ప్రాంగణంలో భక్తులకు స్వయంగా పానకం, పులిహోర ప్రసాదాలను పంపిణీ చేశారు. భువనేశ్వరి చేతుల మీదుగా ప్రసాదం తీసుకోవడానికి భక్తులు భారీగా తరలివచ్చారు. ఆమె సామాన్యుల మధ్య ఉండి ప్రసాదాలు పంచడం అక్కడి వారిని విశేషంగా ఆకట్టుకుంది.

స్థానిక టీటీడీ కళ్యాణ మండపంలో జరిగిన సభలో భువనేశ్వరి మాట్లాడుతూ మహిళా శక్తిని కొనియాడారు. గతంలో చంద్రబాబు నాయుడు అక్రమ కేసుల వల్ల 50 రోజులకు పైగా జైలులో ఉన్నప్పుడు, ఆ క్లిష్ట సమయంలో రోడ్లపైకి వచ్చి పోరాడింది మహిళలేనని ఆమె గుర్తు చేశారు. “స్త్రీలు తలచుకుంటే సాధించలేనిది ఏదీ లేదు, వారి శక్తి అపారమైనది” అని ఆమె వ్యాఖ్యానించడం అక్కడి మహిళా కార్యకర్తల్లో పెద్ద ఎత్తున ఉత్సాహాన్ని నింపింది.

ఎన్టీఆర్ ట్రస్ట్ ద్వారా అండగా.. ఎన్టీఆర్ మెమోరియల్ ట్రస్ట్ మేనేజింగ్ ట్రస్టీగా ఆమె కుప్పం నియోజకవర్గంలో ట్రస్ట్ ద్వారా జరుగుతున్న సేవా కార్యక్రమాలను వివరించారు. ట్రస్ట్ ద్వారా వేలాది మంది యువతకు ఉద్యోగ, ఉపాధి అవకాశాలు కల్పిస్తున్నామని తెలిపారు. బడుగు బలహీన వర్గాలు, దివ్యాంగులు, నిరుపేద మహిళలకు ట్రస్ట్ ఎల్లప్పుడూ అండగా ఉంటుందని భరోసా ఇచ్చారు. దాతలు అందించే ప్రతి పైసా అర్హులైన పేదలకు నేరుగా చేరేలా పారదర్శకమైన వ్యవస్థను నడుపుతున్నామని స్పష్టం చేశారు. ఈ సందర్భంగా లబ్ధిదారులు తాము పొందిన సహాయాన్ని గుర్తు చేసుకుంటూ కృతజ్ఞతలు తెలిపారు.

కుప్పం టీడీపీ కార్యాలయ తలుపులు ప్రజల కోసం 24 గంటలు తెరిచే ఉంటాయని భువనేశ్వరి ప్రకటించారు. ఎవరికైనా ఎలాంటి సమస్య ఉన్నా నిర్భయంగా వచ్చి ప్రజా దర్బార్‌లో ఫిర్యాదు చేయవచ్చని, బాధితులకు న్యాయం జరిగే వరకు తాము అండగా ఉంటామని హామీ ఇచ్చారు. ఈ నాలుగు రోజుల పర్యటనలో ఆమె స్థానిక సమస్యలను నేరుగా విని, వాటి పరిష్కారానికి సంబంధిత అధికారులతో పార్టీ శ్రేణులతో చర్చించారు.