150 దేశాలు.. 2000 స్టాంపులు.. విశాఖలో వన్యప్రాణుల అరుదైన ప్రదర్శన..! Rare wildlife stamps unveiled at Visakhapatnam Biodiversity Park. | విశాఖపట్నం వార్తలు (Visakhapatnam News)

ఈ ప్రదర్శనలో తాబేళ్లు, రామచిలుకలు, వివిధ రకాల పాములు, మొసళ్లు, బంగారు పిచ్చుకలు వంటి అరుదైన జంతువుల చిత్రాలతో కూడిన పోస్టల్ స్టాంపులు ప్రత్యేక ఆకర్షణగా నిలుస్తున్నాయి. అంతేకాకుండా మంచుకొండల్లో నివసించే జంతువులు, వివిధ రకాల సీతాకోకచిలుకలు, పూల చెట్లు, శాండిల్‌వుడ్ వంటి ప్రకృతి సంపదకు సంబంధించిన స్టాంపులు కూడా సందర్శకులను మంత్ర ముగ్ధులను చేస్తున్నాయి. ఒక్కో స్టాంపు వెనుక ఒక దేశం, ఒక సంస్కృతి, ఒక జీవ వైవిధ్య కథ దాగి ఉండటమే ఈ ప్రదర్శన ప్రత్యేకతగా చెప్పుకోవచ్చు.

ఈ కార్యక్రమాన్ని నిర్వహించిన రామమూర్తి మంతా మాట్లాడుతూ, తన తండ్రి నుంచి వచ్చిన స్టాంపుల సేకరణ అలవాటును కొనసాగిస్తూ మరింత విస్తృతంగా ఈ అరుదైన స్టాంపులను సేకరిస్తున్నట్లు తెలిపారు. ముఖ్యంగా నేటి తరం యువత పోస్టల్ సేవల వినియోగాన్ని తగ్గించడంతో, పోస్టల్ స్టాంపుల ప్రాముఖ్యత క్రమంగా తగ్గిపోతున్నదని ఆవేదన వ్యక్తం చేశారు. అందుకే ఈ ప్రదర్శన ద్వారా యువతలో అవగాహన పెంచాలని లక్ష్యంగా పెట్టుకున్నట్లు చెప్పారు.

ప్రపంచవ్యాప్తంగా వన్యప్రాణులపై ముద్రించిన ఈ స్టాంపులు, ప్రకృతి పరిరక్షణ ఎంత ముఖ్యమో గుర్తుచేస్తున్నాయని నిర్వాహకులు పేర్కొన్నారు. ఈ ప్రదర్శనను సందర్శించే విద్యార్థులు, ప్రజలు వన్యప్రాణుల విలువను అర్థం చేసుకుని, వాటి సంరక్షణలో భాగస్వాములు కావాలని ఆశాభావం వ్యక్తం చేశారు. ఇలా అరుదైన స్టాంపుల రూపంలో ప్రపంచ వైవిధ్యాన్ని ఒకేచోట చూపిస్తూ, ఈ ఎగ్జిబిషన్ విశాఖలో ప్రత్యేక ఆకర్షణగా నిలుస్తోంది.