Gas Shortage: ఆ జిల్లాలో గ్యాస్ కష్టాలు.. ఓటీపీ వచ్చినా సిలిండర్ అందడం లేదు.. ఏజెన్సీల వద్ద భారీ క్యూలు! |

కొంతమంది వినియోగదారులకు సిలిండర్ డెలివరీ అయినట్లుగా ఓటీపీ సందేశాలు వస్తున్నప్పటికీ, వాస్తవానికి తమకు సిలిండర్ అందలేదని వారు ఆరోపిస్తున్నారు. ఈ పరిణామం ప్రజల్లో మరింత అసంతృప్తి, ఆందోళనలకు దారితీస్తోంది. గ్యాస్ కోసం రోజంతా వేచి చూసినా సరఫరా జరగకపోవడంతో మహిళలు, వృద్ధులు తీవ్ర ఇబ్బందులు ఎదుర్కొంటున్నారు.

ఈ సమస్యపై స్పందించిన స్థానిక తహసీల్దార్ కూర్మనాథరావు, ప్రస్తుతం గ్యాస్ సరఫరా వ్యవస్థపై ప్రత్యేక తనిఖీలు నిర్వహిస్తున్నట్లు తెలిపారు. జాయింట్ కలెక్టర్ ఆదేశాల మేరకు పట్టణంలోని అన్ని గ్యాస్ ఏజెన్సీలను పరిశీలించినట్లు వెల్లడించారు. గ్యాస్ సిలిండర్ల బుకింగ్స్ సంఖ్య అధికంగా పెరగడం వల్ల డిమాండ్ ఎక్కువగా ఉందని, అయితే సరఫరా తక్కువగా ఉండటం వల్ల ఆలస్యం జరుగుతోందని తెలిపారు.

ప్రస్తుతం పరిస్థితులు సాధారణంగా ఉండకపోవడంతో గతంలో రెండు రోజుల్లో జరిగే డెలివరీలు ఇప్పుడు ఐదు రోజులు పడుతున్నాయని ఆయన వివరించారు. అయితే అవసరమైనంత స్టాక్ అందుబాటులోకి వస్తుందని, రాబోయే పది రోజుల్లో అన్ని పెండింగ్ బుకింగ్స్ క్లియర్ చేస్తామని భరోసా ఇచ్చారు. ఇదే సమయంలో ప్రజలు గ్యాస్ ఏజెన్సీల వద్ద గుంపులుగా చేరి ఆందోళన చేయవద్దని అధికారులు సూచించారు. అలాంటి పరిస్థితులు ఏర్పడితే అక్కడి సిబ్బంది పని చేయడంలో ఆటంకాలు కలుగుతాయని, దాంతో సరఫరా మరింత ఆలస్యమవుతుందని తెలిపారు.

గ్యాస్ సిలిండర్లు ఇంటి వద్దకే డెలివరీ అవుతాయని, వినియోగదారులు ఏజెన్సీల వద్దకు రావాల్సిన అవసరం లేదని స్పష్టం చేశారు. బుకింగ్ చేసిన వినియోగదారులు తప్పనిసరిగా ఓటీపీ ధృవీకరణ పూర్తి చేస్తే సిలిండర్ అందుతుందని అధికారులు పేర్కొన్నారు. ఎవరూ ఆందోళన చెందకుండా సహనం పాటించాలని కోరారు. విజయనగరం పట్టణంలో గ్యాస్ కొరత తాత్కాలికమేనని అధికారులు చెబుతున్నప్పటికీ, ప్రస్తుత పరిస్థితుల్లో ప్రజలు ఎదుర్కొంటున్న ఇబ్బందులు మాత్రం తీవ్రంగా ఉన్నాయని స్పష్టమవుతోంది. త్వరితగతిన సరఫరా సాధారణ స్థితికి చేరాలని ప్రజలు ఆశిస్తున్నారు.