ట్రాన్స్‌జెండర్లకు గోల్డెన్ ఛాన్స్.. ఉచితంగా ఆటోలు పంపిణీ.. స్వయం ఉపాధికి బిగ్ బూస్ట్..! transgender welfare in Visakhapatnam | విశాఖపట్నం వార్తలు (Visakhapatnam News)

విశాఖపట్నం జిల్లా కలెక్టరేట్ కార్యాలయంలో నిర్వహించిన కార్యక్రమంలో ట్రాన్స్‌జెండర్లకు సబ్సిడీపై ఆటోలు పంపిణీ చేశారు. స్వయం ఉపాధి ద్వారా వారు ఇతరులపై ఆధారపడకుండా జీవించేందుకు ఇది ఎంతో సహాయపడుతుందని మంత్రి తెలిపారు. ట్రాన్స్‌జెండర్లు సమాజంలో గౌరవంగా నిలబడేలా ఉపాధి అవకాశాలు కల్పించడం ప్రభుత్వ ప్రధాన ఉద్దేశమని ఆయన పేర్కొన్నారు.

ఇక ఇప్పటికే విశాఖలో 20 మంది ట్రాన్స్‌జెండర్లను కేజీహెచ్‌లో శానిటేషన్ సూపర్వైజర్లుగా నియమించినట్లు తెలిపారు. ఇంకా అర్హులైన వారిని గుర్తించి మరిన్ని ఉద్యోగ అవకాశాలు కల్పించేందుకు ప్రభుత్వం చర్యలు తీసుకుంటోందన్నారు. ట్రాన్స్‌జెండర్లకు గుర్తింపు కార్డులు ఇవ్వడం, సింగిల్ రేషన్ కార్డుల కోసం చర్యలు చేపట్టడం వంటి కీలక నిర్ణయాలు కూడా అమల్లో ఉన్నాయని వెల్లడించారు.

ట్రాన్స్‌జెండర్ల స్వయం సహాయక బృందాల ఏర్పాటుకు ప్రభుత్వం ప్రోత్సాహం ఇస్తోంది. అలాగే వారికి ఉచిత బస్సు ప్రయాణ సౌకర్యం కల్పించడం ద్వారా వారి రోజువారీ జీవనాన్ని సులభతరం చేస్తోంది. కేవలం సామాజిక గుర్తింపుకే కాకుండా, వారి జీవనోపాధిని బలోపేతం చేసే దిశగా ప్రభుత్వం తీసుకుంటున్న ఈ చర్యలు విశేషంగా నిలుస్తున్నాయి.

ఈ సందర్భంగా ఆటోలు పొందిన ట్రాన్స్‌జెండర్లు తమ ఆనందాన్ని వ్యక్తం చేశారు. ఇప్పటివరకు ఇతరులపై ఆధారపడాల్సి వచ్చిందని, ఇప్పుడు స్వయంగా సంపాదించే అవకాశం రావడం ఎంతో సంతోషంగా ఉందన్నారు. తమకు ఉద్యోగ అవకాశాలు కల్పించడంతో పాటు ఆటోలు అందించడం ద్వారా ప్రభుత్వం తమ జీవితాల్లో కొత్త మార్గాన్ని చూపిందని చెప్పారు. ఈ అవకాశాన్ని సద్వినియోగం చేసుకుని గౌరవప్రదమైన జీవితం గడుపుతామని తెలిపారు.